Tsarnaevtyń advokattary Bostondaǵy sotty basqa qalaǵa aýystyrýdy talap etýde
ASTANA. QazAqparat - Ótken jylǵy sáýirde Boston marafony kezinde lańkestik jasady dep aıyptalǵan Djohar Tsarnaevtyń advokattary úderis shynaıy júrgizilýi maqsatynda onyń sotyn Bostonda emes, AQSh-tyń basqa qalasynda ótkizýdi talap etýdi jalǵastyrýda, dep habarladyTASS.
Olar dúısenbide Bostonnyń federaldyq sotyna tıisti qoldaýhat berdi.
Qorǵaýshylar BAQ-tyń nazaryna erekshe ilikken Tsarnaevqa qatysty sot isi qala turǵyndarynyń aıyptalýshyǵa degen birjaqty pikirin qalyptastyrǵan, sondyqtan da sot ádil ótpeýi múmkin dep sanaıdy.
Advokattardyń aıtýynsha, Bostonda Tsarnaevtyń taǵdyryn sheshetin ádil alqabılerdi tabý múmkin emes.
Qyrkúıekte sýdıa Djordj O'Týl Bostonda obektıvti qorǵaýshy tabý múmkin emestigin dáleldeıtin aıǵaqtardyń jetkiliksiz bolýyna baılanysty advokattardyń sotty basqa qalaǵa aýystyrý týraly ótinishin qabyldamaǵan bolatyn.
Qazir qorǵaýshylar jańa qoldaýhat berip, sýdıadan osy másele boıynsha sot aldyndaǵy tyńdaý ótkizgenin ótinýde. Budan buryn advokattar Tsarnaevqa qatysty sotty AQSh astanasy Vashıngtonǵa aýystyrýdy usynǵan.
Amerıkandyq zańǵa sáıkes ádette sot qylmys jasalǵan qalada qaralady. Alaıda advokattar eger sotty aldyn ala kelisilgen dep sanasa, olardyń basqa qalaǵa aýystyrýdy ótinýge quqyǵy bar. Mysaly, 1995 jyly Oklahoma-Sıtı (Oklahoma shtaty) qalasynda lańkestik uıymdastyrǵan ońshyl ekstremıst Tımotı Makveıge qatysty sot úderisi Denever (Kolorado shtaty) qalasyna aýystyrylǵan. Makveı uıymdastyrǵan jarylys saldarynan 168 adam qaza taýyp, 168 adam jaralanǵan.
Tsarnaevtyń advokattary osy jaǵdaıǵa silteme jasaýda. «Basqa qalaǵa aýystyryp, sottyń ádil ótkenin qalaımyz», - delingen qoldaýhatta.
2013 jylǵy 15 sáýirde Boston ortalyǵynda marafonnyń máre syzyǵyna jaqyn mańda 12 sekýnd aralyǵynda eki jarylys boldy. Onyń saldarynan úsh adam qaza taýyp, 260-tan astam adam jaraqat aldy. Birneshe kúnnen keıin Djohar Tsarnaev Bostan mańyndaǵy jekemenshik úıdiń biriniń aýlasyndaǵy kemeden tabyldy, arnaıy operatsııa júrgizgennen keıin ol tutqynǵa alyndy. Ótken jylǵy shildede is boıynsha alǵashqy sot tyńdaýy ótti. Tsarnaev oǵan taǵylǵan (30 tarmaq) aıyptyń birde-birin moıyndamady.
Boston mańyndaǵy túrmede jatqan lańkestiń soty kelesi jyldyń 5 qańtaryna taǵaıyndalǵan. Prokýrorlar Tsarnaevqa ólim jazasyn kesýdi talap etýge nıetti.
