Tsarnaevtardyń qyrǵyzstandyq dosy AQSh-ta jalǵan aqparat bergeni úshin 2,5 jylǵa sottaldy
ASTANA. QazAqparat - Bostondaǵy sot aǵaıyndy Tsarnaevtardyń dosy Haırýllojon Matanovty jalǵan aqparat bergeni úshin 2,5 jylǵa bas bostandyǵynan aıyrý jazasyna kesti.
Sot úderisi barysynda AQSh-qa 2010 jyly Qyrǵyzstannan stýdenttik vızamen kelip, keıin munda saıası baspana alǵan 24 jastaǵy Matanov ózin Bostondaǵy lańkestik isti tergeý kezinde Federaldyq tergeý bıýrosyna aǵaıyndy Tsarnaevtarmen baılanysy týraly jalǵan aqparat bergenin moıyndady, dep habarlaıdy Bı-bı-sı.
Matanov Tamerlan men Djohar Tsarnaevtarmen marafon máresinde jarylystar bolǵan kúni, ıaǵnı 2013 jyldyń 15 sáýirinde keshki tamaq ishken. Úsh kúnnen keıin ol bul oqıǵada kúdikti tanylǵan adamdardyń sýretterin kórgen, biraq bılik kózderine Tsarnaevtar týraly aqparatty tek kelesi kúni habarlaǵan.
Aǵaıyndy Tsarnaevtarmen baılanysy týraly baıandaǵan Matanov tergeýge kómektesýi múmkin mańyzdy málimetterdi jasyrǵan.
«Sizden bar suraǵanymyz - bizge kómektesý. Biz kómegińizge muqtaj edik, biraq siz olaı jasamadyńyz», - dedi sottyń sońǵy otyrysynda sýdıa Ýılıam ıAng.
«FTB-niń aldynda jalǵan aqparat úshin keshirim suraǵym keledi. Men eshqandaı lańkestik uıymdardy jaqtamaımyn», - dep málimdedi sot úkimi jarııalanǵannan keıin Haırýllojon Matanov.
FTB-de júrgizilgen suraýdan keıin Matanov marafondaǵy jarylystardan keıin Tsarnaevtarmen birge keshki as ishkenin aıtyp, biraq birge tamaqtaný ıdeıasyn ózi emes, olar usynǵany týraly ótirik aıtty.
Ol polıtsııaǵa habarlamas buryn ǵalamtorda olardyń sýretterin qansha ret qarap shyqqanyn durys aıtpady jáne Bostondaǵy jarylystardan keıin kompıýterinen óshirip tastaǵan djıhadtyq beınejazbalardy qaraǵanyn joqqa shyǵarǵan. Qorǵaý tarapynyń aıtýynsha, bul baıandardyń Tsarnaevtarǵa qatysy joq bolǵan, olar Matanovtyń qyzyǵýshyqtaryn ǵana áshkereledi.
Eske sala keteıik, 2013 jyldyń 15 sáýirinde Boston qalasynyń ortalyǵynda marafonnyń máre syzyǵyna jaqyn jerde arada 12 sekýnd salyp qatarynan eki jarylys boldy. Sonyń saldarynan úsh adam qaza taýyp, 260-tan astamy jaraqattar aldy. Amerıkanyń bılik kózderi bul jarylystardy aǵaıyndy Tsarnaevtar uıymdastyryp, oryndady degen qorytyndy jasady. Lańkestik áreketten keıin birneshe kún ótken soń aǵaıyndylardyń úlkeni - Tamerlan polıtseılermen bolǵan atys kezinde óltirildi, al kishisi Djohar jaralanyp, qamaýǵa alyndy. Sot sheshimimen ol jarylystardy uıymdastyrýda aıypty dep tanylyp, bıylǵy jyldyń mamyr aıynda ólim jazasyna kesildi. Sottyń sońǵy sheshimi 24 shildede belgili bolady.
