«CarGoRuqsat»: elektrondyq kezek quny qansha

ASTANA. KAZINFORM — Qazaqstandaǵy shekara ótkizý pýnktterinde qoldanylatyn «CarGoRuqsat» elektrondyq kezek júıesi aqyly negizde jumys isteıdi. Bul týraly QR Qarjy mınıstrligi Memlekettik kirister komıtetiniń ókili Baıdos Baıbozın tikeleı efırde málimdedi. 

Onyń aıtýynsha, elektrondyq kezekti «CarGoRuqsat» mobıldi qosymshasy nemese veb-nusqasy arqyly aldyn ala brondaýǵa bolady. Bul tasymaldaýshylarǵa shekaradan ótý ýaqytyn tıimdi josparlaýǵa múmkindik beredi.

— Elektrondyq kezek aqyly negizde jumys isteıdi. Tólem mólsherleri Qarjy mınıstriniń 2023 jylǵy 25 mamyrdaǵy № 538 buıryǵymen bekitilgen, al tólem tártibi 2023 jylǵy 27 maýsymdaǵy № 707 buıryqta kózdelgen. Qazirgi tańda standartty brondaý quny — 1 aılyq eseptik kórsetkish, jedel ótý — 100 AEK, al kepildik jarna — 20 AEK. Kepildik jarna bron talapqa saı paıdalanylǵan jaǵdaıda qaıtarylady nemese qaıta qoldanýǵa múmkindik beredi, — dedi Baıdos Baıbozın.

Osylaısha, atalǵan júıe shekaradan ótý úderisin jeńildetip, kólik aǵyndaryn tıimdi retteýge múmkindik berip otyr.

Aıta keteıik, buǵan deıin elektrondyq kezek arqyly shekaradan 1 mln-nan astam júk kóligi ótkenin jazǵan edik.