Elorda áýejaıyn damytýǵa 1,1 mlrd dollar ınvestıtsııa tartylady
ASTANA. KAZINFORM — Astana halyqaralyq áýejaıy aýmaǵynda kópfýntsıonaldy keshen salynady. Ol úshin 1,1 mlrd dollar ınvestıtsııa tartylady. Bul týraly Kólik mınıstrligi habarlaıdy.
Kólik mınıstrligi men Terminals Astana Airport Limited kompanııasy (Terminals holding quramyna kiredi, BAÁ) arasynda áýejaıdy jáne oǵan irgeles aýmaqty keshendi damytýǵa baǵyttalǵan ınvestıtsııalyq kelisim jasaldy. Investıtsııanyń jalpy quny 1,1 mlrd dollardy quraıdy.
Kelisim aıasynda ınvestor ekinshi ushý-qoný jolaǵyn, úshinshi jolaýshylar termınalyn, sondaı-aq júkterge arnalǵan cargo termınal salady. Sondaı-aq, ınvestor ındýstrııalyq — logıstıkalyq aımaǵy men qonaqúıleri, saýda alańdary, logıstıkalyq termınaldary bar bıznes-klasterdi qamtıtyn kópfýnktsıonaldy aerotropolıs keshenin damytýdy josparlap otyr.
Odan bólek, arnaıy tehnıka parkin jańartý, tsıfrlyq sheshimder men avtomattandyrý júıelerin engizý, áýejaı qyzmetkerlerin kezeń-kezeńimen oqytyp, biliktilikti arttyrý jumystary josparda bar. Qyzmetkerler halyqaralyq avıatsııalyq talaptarǵa sáıkes arnaıy trenıngterden ótedi.
Sonymen qatar Kólik mınıstrligi men BAÁ Energetıka jáne ınfraqurylym mınıstrligi arasynda avtomobıl kóligi salasyndaǵy yntymaqtastyq týraly ózara túsinistik týraly memorandýmǵa qol qoıyldy. Taraptar tehnıkalyq bilimmen, daǵdylarmen jáne ozyq tájirıbe almasýǵa nıetti. Jaqyn arada Qazaqstan men BAÁ arasyndaǵy avtomobıl kóligimen halyqaralyq tasymaldaý máselelerin reglamentteýge múmkindik beretin úkimetaralyq kelisimge qol qoıylady dep kútiledi.
Aıta ketsek, búginde Qazaqstan halyqaralyq avtotasymaldaý aıasynda 42 úkimetaralyq kelisim jasasty.
Eske salaıyq, bıyl Astana men Almaty áýejaıy Ortalyq Azııa men TMD boıynsha úzdik atandy.
— Nursultan Nazarbaev halyqaralyq áýejaıy Skytrax World Airport Awards 2025 syılyǵynyń «Ortalyq Azııa men TMD elderi áýejaılary arasyndaǵy eń úzdik personal» nomınatsııasy boıynsha jeńimpaz atandy, — dep habarlady Azamattyq avıatsııa komıteti.