Carapshylar Ózbekstannyń memlekettik basqarý reformasyn talqylady
NUR-SULTAN. QazAqparat - Halyqaralyq sarapshylar qaýymdastyǵy Ózbekstandaǵy memlekettik jáne qoǵamdyq qurylys júıesin jetildirý máseleleri boıynsha óz pikirlerimen bólisti. Dóńgelek ústeldi Ózbekstan Respýblıkasy Prezıdenti janyndaǵy Memlekettik basqarý akademııasy, Qazaqstandaǵy jáne Ózbekstandaǵy Frıdrıh Ebert qory ókildigi men Astana memlekettik qyzmet haby uıymdastyrdy, dep habarlaıdy QazAqparat.
Jıynǵa Azııa, Amerıka jáne Eýropa elderiniń memlekettik organdary, saraptamalyq ortalyqtary men bilim berý mekemeleriniń 150-den astam ókili qatysty.
Dóńgelek ústelde Ózbekstan Respýblıkasy Olıı Májilisi Zań shyǵarý palatasy spıkeriniń bBirinshi orynbasary Akmal Saıdov, sonymen birge Ózbekstan, Qazaqstan, Qyrǵyzstan jáne Reseıdegi memlekettik basqarý akademııalary jetekshileri, Qazaqstandaǵy jáne Ózbekstandaǵy Frıdrıh Ebert qory aımaqtyq bóliminiń basshysy sóz sóıledi. Olar memlekettik basqarý reformasy, adam quqyqtary men azamattyq qoǵamdy jandandyrý salasyndaǵy Ózbekstannyń jetistikterin atap ótti.
Óz kezeginde, Astana memlekettik qyzmet haby Basqarýshy komıteti tóraǵasy Álıhan Baımenov óz sózinde Ózbekstan habqa qatysýshy belsendi elderdiń biri ekenin atap ótti. Sonymen qatar ol halyqaralyq tájirıbege sáıkes memlekettik basqarý sapasy men keshendi strategııalardy júzege asyrýda eskerilý qajet faktorlarǵa toqtaldy. Onyń ishinde strategııalyq jáne bıýdjettik josparlaý júıesiniń tutastyǵyn, ınstıtýttaralyq qatynastardyń aıqyndyǵyn, aqparattyq aǵyndardy ońtaılandyrýdy, memlekettik apparat ishindegi bıznes-úderister men memlekettik qyzmetterdi kórsetý úderisterin ońaılatýdy, qoǵamdyq qatysý men azamattyq belsendilikti qamtamasyz etýge erekshe nazar aýdardy.
Talqylaý barysynda is-sharaǵa qatysýshylar spıkerlerge suraqtar qoıyp, memlekettik basqarý men qoǵamdyq qurylys júıesin odan ári jetildirýdiń joldary men baǵyttaryn talqylady.
