Call-ortalyqtarǵa menıngıtke qatysty 8 myńnan astam saýaldar túsken

ASTANA. QazAqparat - «Shuǵyl jeli» arqyly menıngıttiń aldyn alý, dıagnostıkalaý jáne emdeý máseleleri jóninde halyqtan 8 myńnan astam qońyraý qabyldanǵan, dep habarlaıdy QazAqparat tilshisi.

«Halyqqa ýaqtyly, jedel keńes berý úshin barlyq oblystardyń Call-ortalyqtarynda «shuǵyl jeli» telefondarynyń jumysyn bastadyq. Birinshi táýlikte ǵana halyqtan shamamen 4,5 myń qońyraý tústi. Al eki kún ishinde - 8 myńńan astam saýal joldandy», - dedi QR Densaýlyq saqtaý mınıstrliginiń Qoǵamdyq densaýlyq saqtaý komıtetiniń tóraǵasy - QR Bas sanıtarlyq dárigeri Jandarbek Bekshın Ortalyq kommýnıkatsııalar qyzmetinde ótken baspasóz konferentsııasynda.

Eldiń bas sanıtarlyq dárigeri BAQ pen Densaýlyq saqtaý mınıstrliginiń halyqty aqparattandyrý men túsindirý boıynsha birlesken jumystary adamdardyń aýrýǵa degen durys reaktsııasyna alyp kelgenin atap ótti.

«Birinshi belgileri paıda bolǵan boıda adamdar medıtsınalyq pýnkterge kelip jatyr. Halyq tek kúndizgi ýaqytta ǵana emes, sondaı-aq túnde de qaralyp jatyr», - dedi J.Bekshın.