Call of Duty oıynynan Seýldegi qaıǵyly oqıǵa túsirilgen vıdeo alynyp tastalady
ASTANA. KAZINFORM — Call of Duty vıdeoıynyn ázirleýshi Activision Publishing kompanııasy Ońtústik Koreıanyń Itevon aýdanyndaǵy adam ólimine ákep soqqan keptelis kezindegi beınejazbany oıynǵa qosqany úshin synǵa ushyrap, keshirim surady. Bul týraly Yonhap agenttigi jazdy.
Kompanııa daýly vıdeony 12 qarashada shyǵatyn oıynnan alyp tastaıtynyn málimdedi.
Qysqa beıne Call of Duty: Modern Warfare 4 oıynynyń basynda kórsetilgen. Onda kóshede jatqan adamǵa feldsherdiń kómek kórsetip jatqany beınelengen. Ázirleýshiler bul kadrlardy Soltústik Koreıamen oıdan shyǵarylǵan áskerı qaqtyǵystyń saldaryn kórsetý úshin paıdalanǵan.
Activision kompanııasy oqıǵadan zardap shekkenderden, qaza tapqandardyń týystarynan jáne bul beınejazbany kórip kóńiline qaıaý túsken barlyq adamnan keshirim surady.
Kompanııa ókilderi oıynǵa qaıǵyly oqıǵalar týraly jańalyqtardan alynǵan kadrlardy qosýdy nemese qaza tapqandardyń rýhyna qurmetsizdik tanytýdy maqsat etpegenin atap ótti.
Eske salaıyq, Itevon aýdanyndaǵy qaıǵyly oqıǵa 2022 jylǵy 29 qazanda Helloýın merekesi kezinde bolǵan. Seýl qalasynyń ortalyǵyndaǵy tar kóshelerdiń birinde adam keptelisi týyndap, saldarynan 158 adam qaza tapty. Marqumdardyń arasynda Ońtústik Koreıadaǵy joǵary oqý oryndarynyń birinde bilim alǵan Qazaqstan azamaty, Aqtóbe oblysynyń týmasy da boldy. Qaıǵyly oqıǵadan keıin qaza tapqandardyń týystary onyń mán-jaıyn tergeýdi jáne jaýapty adamdardy zań aldynda jaýapqa tartýdy talap etti.
