C919 alǵashqy halyqaralyq reısin oryndaýǵa daıyn
ASTANA. KAZINFORM – Qytaılyq C919 jolaýshy ushaǵy alǵash ret halyqaralyq jolaýshy reısin oryndamaq. 12 tamyzda ushaq Beıjiń–Ulanbatyr baǵytynda ushady, dep habarlaıdy sıngapýrlyq Lianhe Zaobao basylymy.
Basylymnyń málimetinshe, bul – C919 ushaǵy úshin alǵashqy turaqty halyqaralyq jolaýshy reısi. Reısterdi Air China áýe kompanııasy oryndaıdy.
Kestege sáıkes, CA723 reısi Beıjiń ýaqytymen saǵat 15:00-de Beıjiń halyqaralyq áýejaıynan ushyp, jergilikti ýaqyt boıynsha 17:15-te Ulanbatyrdaǵy Shyńǵyshan áýejaıyna qonady. Keri baǵyttaǵy CA724 reısi jergilikti ýaqytpen 18:30-da Ulanbatyrdan kóterilip, Beıjiń ýaqytymen 20:35-te Qytaı astanasyna jetedi.
Basylymnyń dereginshe, Beıjiń–Ulanbatyr áýe baǵytynyń tarıhy 1958 jyldan bastalady. Qazirgi ýaqytta bul baǵytty Air China men Mońǵolııa azamattyq avıatsııasy birlesip paıdalanady. Buǵan deıin, 2025 jylydyń shilde aıynan beri, Air China kompanııasy qytaılyq C909 óńirlik jolaýshy ushaǵymen Hýh-Hoto – Ulanbatyr halyqaralyq baǵyty boıynsha reısterdi iske asyryp keledi.
Sarapshylardyń pikirinshe, Ulanbatyr baǵytynyń ashylýy C919 ushaǵynyń kommertsııalyq geografııasyn Qytaıdyń ishki jáne óńirlik baǵyttarynan halyqaralyq naryqqa keńeıtýge jol ashatyn mańyzdy qadam bolmaq.
Qytaılyq C919 ushaǵy buǵan deıin tek ishki jáne óńirlik baǵyttarda ǵana paıdalanylyp kelgen. 2025 jylǵy 1 qańtarda China Eastern Airlines kompanııasy alǵash ret C919 ushaǵymen Shanhaı–Gonkong turaqty reısin oryndady. Sol jyldyń qarashasynda Air China da Beıjiń – Gonkong baǵytynda C919 ushaǵyn turaqty túrde qoldana bastady.
Air China alǵashqy C919 ushaǵyn 2024 jyly tamyzda qabyldaǵan. Qazirgi ýaqytta kompanııa parkinde olardyń sany 12-ge jetip, ushý geografııasyn bir jarym jyldyń ishinde Qytaıdyń onnan astam qalasyna keńeıdi.
Basylymnyń jazýynsha, C919 – halyqaralyq standarttarǵa sáıkes ázirlengen, orta jáne qysqa qashyqtyqqa arnalǵan alǵashqy qytaılyq magıstraldyq jolaýshy ushaǵy. Ol 2023 jyldyń mamyrynda alǵashqy kommertsııalyq jolaýshy reısin oryndady. 2026 jyly sáýir aıynyń sońyna deıin C919 ushaqtary 42 myńnan astam kommertsııalyq jolaýshy reısin júzege asyryp úlgerdi.
Buǵan deıin Air China kompanııasy Beıjiń men Bishkek arasynda tikeleı turaqty áýe qatynasyn ashqanyn habarlaǵan bolatynbyz.
