C5+1 formatynda mádenı murany saqtaý máseleleri talqylandy
ASTANA.KAZINFORM — Qazaqstan C5+1 formatynda mádenı yntymaqtastyqty damytýǵa baǵyttalǵan jańa bastamalar usyndy.
Ótken jyldyń qarasha aıynda Vashıngtonda Qazaqstan Respýblıkasynyń Prezıdenti Qasym-Jomart Toqaevtyń qatysýymen «Ortalyq Azııa — AQSh» sammıti ótken bolatyn. Sammıt qorytyndysy boıynsha qatysýshy memleketter arasyndaǵy ózara is-qımyldyń jańa baǵyttary aıqyndaldy.
Qol jetkizilgen ýaǵdalastyqtardy jalǵastyrý maqsatynda búgin Tashkent qalasynda Ortalyq Azııa elderi men AQSh mádenıet mınıstrleriniń C5+1 formatyndaǵy kezdesýi ótti. Qazaqstan tarapynan atalǵan jıynǵa Premer-mınıstrdiń orynbasary — Mádenıet jáne aqparat mınıstri Aıda Balaeva qatysty. Іs-sharaǵa sondaı-aq AQSh Memlekettik hatshysynyń qoǵamdyq dıplomatııa jáne qoǵamdyq baılanystar máseleleri jónindegi orynbasary Sara Rodjers qatysty.
Kezdesý barysynda taraptar mádenı-gýmanıtarlyq yntymaqtastyqty odan ári damytý perspektıvalaryn talqylady.
Aıda Balaeva Memleket basshylary sammıti aıasynda mádenı murany saqtaý jónindegi Birlesken málimdeme qabyldanǵanyn atap ótti. Atalǵan qujat mádenı qundylyqtardy qorǵaý, mýzeı isi salasyndaǵy yqpaldastyqty damytý jáne mádenı murany tsıfrlandyrý baǵytynda qalyptasqan kópjyldyq áriptestikti nyǵaıtýǵa degen ortaq ustanymdy aıqyndaıdy.
Úkimet basshysynyń orynbasary yntymaqtastyq formatyn keńeıtý birlesken jumysty jańa deńgeıge kóterýge múmkindik beretinin aıtty. Atap aıtqanda, C5+1 elderi arasynda mádenıet jáne kreatıvti ındýstrııalar salasyndaǵy ózara is-qımyldy kúsheıtý, tsıfrlyq jobalardy damytý, kásibı tájirıbe almasýdy jolǵa qoıý, týrıstik marshrýttardy ilgeriletý jáne halyqaralyq seriktestikti keńeıtý máseleleri basym baǵyttardyń biri retinde qarastyrylýda.
Kezdesý qorytyndysy boıynsha qatysýshylar Ortalyq Azııa elderi men Amerıka Qurama Shtattary mádenıet mınıstrleri keńesiniń hattamasyna qol qoıdy. Qujatta taraptar mádenı murany saqtaý jónindegi Birlesken málimdeme erejelerin iske asyrýǵa beıildiligin qýattap, óner, ádebıet, teatr, kınematografııa jáne mýzyka salalarynda birlesken is-sharalar men festıvalder ótkizý arqyly yntymaqtastyqty odan ári damytýǵa ýaǵdalasty.
Ortalyq Azııa elderi men AQSh mádenıet mınıstrleriniń kezdesýi aıasynda Aıda Balaeva Sara Rodjerspen jeke kezdesý ótkizdi. Kelissózder barysynda ekijaqty yntymaqtastyqtyń keń aýqymdy máseleleri, sonyń ishinde mádenıet salasyndaǵy baılanystar men jasandy ıntellektke qatysty jobalar talqylandy.
Kezdesý sońynda taraptar C5+1 formatynda ótken Ortalyq Azııa elderi men AQSh mádenıet mınıstrleri jıynynda qol jetkizilgen ýaǵdalastyqtar aldaǵy kezeńde áriptestikti odan ári keńeıtýge berik negiz bolatynyna senim bildirdi.
