C-130 ushaǵynyń apatyn tergeý: Ázerbaıjan, Túrkııa men Grýzııa birlesken halyqaralyq top qurdy
ASTANA.KAZINFORM - Ázerbaıjan, Túrkııa jáne Grýzııa 11 qarashada Grýzııada bolǵan túrik Lockheed C-130 Hercules áskerı-kólik ushaǵynyń apatyn tergeý úshin birlesken halyqaralyq top qurdy, dep habarlaıdy Grýzııanyń Birinshi qoǵamdyq telearnasy.
Grýzııanyń ishki ister mınıstri Gela Geladze izdeý-qutqarý jumystary túrik tarapymen únemi úılestirilip júrgizilip jatqanyn málimdedi.
- Qazirgi ýaqytta qurban bolǵan 18 adamnyń denesi tabyldy, taǵy eki adamnyń súıegin izdeý jumystary júrgizilip jatyr. Biz halyqaralyq izdeý-qutqarý tobyn qurdyq jáne Túrkııa Іshki ister mınıstrligimen únemi baılanysta otyrmyz. Bizdiń túrkııalyq áriptesterimiz izdeý-qutqarý operatsııasyna qosyldy, biz izdeý jumystaryn birlesip júrgizip jatyrmyz. Olar túni boıy oqıǵa ornynda boldy. Bul áskerı ushaq bolǵandyqtan, biz túrik tarapymen birlesip egjeı-tegjeıli aqparat beremiz, - dedi Geladze.
News Georgia agenttiginiń habarlaýynsha, ushaqta F-16 joıǵysh ushaqtaryna arnalǵan mehanıkalyq qosalqy bólshekter, al bortta 20 tehnıkalyq qyzmet kórsetý mamany bolǵan.
Olardyń barlyǵy qaza tapty degen boljam jasaldy.
Ázerbaıjannyń APA aqparat agenttigi apatqa ushyraǵan túriktiń C-130 áskerı ushaǵynyń bortynda 8 qarashada Bakýde ótken áskerı paradqa qatysqan F-16 Fighting Falcon joıǵysh ushaqtaryna tehnıkalyq qyzmet kórsetetin mamandar bolǵanyn naqtylady.
Sondaı-aq, Túrkııanyń apat ornyn zertteýge qatysatyn Akinci apparatyn Grýzııaǵa jibergeni týraly habarlandy. Dál osyndaı dron 2024 jyly apatqa ushyraǵannan keıin Iran prezıdentiniń tikushaǵyn izdeý úshin paıdalanylǵan.
BAQ habarlamalarynda apatqa ushyraǵan ushaq uzaq ýaqyt boıy qyzmet etkeni jáne onyń sońǵy kúrdeli jóndeýi 2020 jyly júrgizilgeni kórsetilgen.
Sarapshylar ushaqtyń korpýsyna syrtqy áser etý belgileri joq ekenin atap ótti.
Aıta keteıik, Ázerbaıjannan ushyp kele jatqan túriktiń C-130 áskerı-kólik ushaǵy 11 qarashada Grýzııada apatqa ushyrady.
Ushaq Grýzııa shekarasynan ótkennen keıin shamamen 5 shaqyrym jerde apatqa ushyrady. Ol Ázerbaıjannan ushyp kele jatqan. Túrkııa Qorǵanys mınıstrliginiń málimeti boıynsha, bortta ekıpajdy qosa alǵanda 20 túrik áskerı qyzmetshisi bolǵan.