BJZQ jınaqtary: memlekettik kepildiktiń jańa tártibi qandaı
ASTANA. KAZINFORM — 2027 jyldyń 1 qańtarynan bastap Qazaqstanda zeınetaqy jınaqtarynyń saqtalýyna beriletin memlekettik kepildikti júzege asyrý tártibi ózgeredi.
Bul rette usynylyp otyrǵan ózgerister memleket tarapynan BJZQ-daǵy zeınetaqy jarnalarynyń saqtalýyn qamtamasyz etýden bas tartýdy bildirmeıdi.
Qazir azamat zeınetaqy tólemderin alýǵa quqyly bolǵan kezde onyń BJZQ-ǵa naqty aýdarǵan zeınetaqy jarnalarynyń somasy ınflıatsııa deńgeıi eskerilip esepteledi. Osy soma men BJZQ-daǵy naqty zeınetaqy jınaqtarynyń arasynda aıyrmashylyq bolsa, ol aıyrma respýblıkalyq bıýdjet esebinen óteledi.
Keler jyldyń 1 qańtarynan bastap bul mehanızm ózgeredi. Qazaqstan Respýblıkasynyń Áleýmettik kodeksiniń 217-babyna sáıkes memleket BJZQ-ǵa naqty aýdarylǵan zeınetaqy jarnalarynyń bastapqy mólsherde saqtalýyna kepildik beredi.
Eńbek mınıstrligi túsindirgendeı, buǵan deıin azamattardyń óz zeınetaqy jınaqtarynyń qalaı ınvestıtsııalanatynyna tikeleı yqpal etý múmkindigi bolǵan joq. Investıtsııalyq saıasatty memleket aıqyndap, salymshylardyń óz qarajatyn basqarý múmkindigin shektedi. Sondyqtan memleket ınvestıtsııadan túsken kiris ınflıatsııa deńgeıinen tómen bolǵan jaǵdaıda týyndaıtyn aıyrmany óteý mindetin óz moınyna aldy.
Qazir salymshylardyń óz zeınetaqy jınaqtaryn basqaratyn kompanııany jáne ınvestıtsııalaý strategııasyn tańdaý múmkindigi keńeıip keledi. Osyǵan baılanysty memlekettik kepildikti burynǵy tártippen qoldanýdyń bastapqy negizi óz mánin joǵaltady.
Bul rette zeınetaqy aktıvterin basqarý júıesi memlekettik baqylaýda qala beredi. Qazaqstan Respýblıkasynyń Prezıdenti basqaratyn Ulttyq qordy basqarý jónindegi keńes ınvestıtsııalyq saıasattyń negizgi baǵyttaryn aıqyndaıdy, aktıvterdi basqarýdyń tıimdiligin arttyrý jónindegi usynystardy qaraıdy jáne ınvestıtsııalaý nátıjeleri týraly esepterdi tyńdaıdy.
Qazaqstan Respýblıkasynyń Ulttyq banki zeınetaqy aktıvterin ınvestıtsııalaýǵa ruqsat etilgen qarjy quraldarynyń tizimin qalyptastyrady. Al Qazaqstan Respýblıkasynyń Úkimeti ınvestıtsııalyq saıasattyń tıisti tásilderi men negizgi parametrlerin bekitedi.
Osylaısha, usynylyp otyrǵan ózgerister memlekettik kepildikti iske asyrý tetigin jetildirýge baǵyttalǵan.
Aıta ketelik zeınetaqy jınaǵyn senimgerlik basqarýǵa berý: aqshanyń jelge ushpaıtynyna qandaı kepildik bar ekendigi týraly jazǵan edik.
