BJZQ jınaǵynyń jetkilikti shegi qanshaǵa kóteriletini kelesi aıda belgili bolady
ASTANA. KAZINFORM – Eńbek jáne halyqty áleýmettik qorǵaý mınıstri Asqarbek Ertaev BJZQ jınaǵynyń jetkiliktilik mejesi qanshaǵa kóteriletini kelesi aıda belgili bolatynyn aıtty.
- Biz qaýly jobasyn eki ret joldaǵanbyz. Birinshi jobada BJZQ shotyndaǵy jetkiliktilik mejesin boljanyp otyrǵan ınflıatsııa deńgeıine kóterýdi usyndyq. Memlekettik organdar buǵan basqa ádisteme kórsetti. Mejeni saralap, sanat boıynsha eseptep kóterýdi usynyp otyr. Qaýly jobasyn qaıta joldadyq, endi kútip otyrmyz. Biz sol esepterdiń ishinen bir formýlany tańdap, qaýly jobasyna engizemiz de, maquldaýǵa jiberemiz. Jalpy kelesi aıda naqty sheshim qabyldaıtyn shyǵarmyz dep oılaımyn, - dedi ol.
Vedomstvo basshysy bul máselede memlekettiń naqty ustanymy bar ekenin aıtty.
- Ol mejeni kóterý kerek. Bul – bizdiń ustanymymyz. Ár azamat zeınet jasyna jetkende laıyqty zeınetaqy alý kerek dep esepteımiz. Sońǵy 5 jylda qordan 5 trln teńge alynǵanyn aıttym. Ony ıpoteka men emdelýge jumsap jatqanyn túsinemin. Biraq keleshekti de oılaý kerek. Zeınet jasyna jınaıtyn aqshamyzdy búgi qurtyp tastaýymyz kerek, - dedi mınıstr.
Aıta ketý kerek, Ulttyq bank tóraǵasy Tımýr Súleımenov qordaǵy jınaqtan qarajat alý sheginiń tásilderin qatańdatý qajettigin aıtqan bolatyn.
