BJZQ jınaǵyn paıdalaný múmkindiginen aıyrylǵan salymshylar qaı óńirde kóp
ASTANA. KAZINFORM — Eń tómengi jetkiliktilik shegin esepteý ádistemesi ózgergennen keıin turǵyn úı satyp alý nemese emdelý maqsatynda zeınetaqy jınaqtaryn paıdalaný quqyǵyna ıe salymshylardyń sany aıtarlyqtaı azaıdy. Biryńǵaı jınaqtaýshy zeınetaqy qory munyń jańa esepteý qaǵıdatyna baılanysty ekenin túsindirdi.
Qordyń málimetinshe, endi eń tómengi jetkiliktilik shegi zeınetaqy shotynda jınaqtalǵan qarajat kólemin eskere otyryp, bolashaqtaǵy maqsatty zeınetaqy tólemderiniń mólsherine negizdelip esepteledi.
— Eń tómengi jetkiliktilik shegin esepteý kezinde endi jınaqty merziminen buryn paıdalanǵan sátten bastap, zeınetkerlik jasqa deıin túsetin bolashaq zeınetaqy jarnalary esepke alynbaıdy. Bul azamattardyń jınaqtarynyń bir bóligin paıdalanǵannan keıin bolashaqta tómen mólsherde jınaqtaýshy zeınetaqy alý qaýpin azaıtýǵa múmkindik beredi. Endi jınaqtaýshy zeınetaqy júıesinen tólenetin bolashaq tólemderdiń mólsheri medıanalyq jalaqynyń keminde 40 paıyzy deńgeıine baǵdarlanǵan. Al buryn bul kórsetkish medıanalyq jalaqynyń eń kóbi 15 paıyzyna deıin ǵana jetýi múmkin edi, — dep túsindirdi BJZQ agenttiktiń resmı saýalyna bergen jaýabynda.
Sondaı-aq qor merziminen buryn alýǵa bolatyn qarajat kólemi de ózgergenin atap ótti. Burynǵy ádisteme boıynsha eń tómengi jetkiliktilik sheginen asatyn jınaǵy bar bir salymshyǵa orta eseppen 2 mıllıon teńgeden sál astam qarajat qoljetimdi bolsa, jańa ádisteme boıynsha bul kórsetkish shamamen 7 mıllıon teńge.
Ádisteme ózgergennen keıin turǵyn úı satyp alýǵa nemese emdelýge arnalǵan birjolǵy zeınetaqy tólemderin paıdalaný múmkindiginen aıyrylǵan salymshylar eń kóp Almaty qalasynda tirkelgen — 146 myń adam. Odan keıin Astana qalasy — 77 myń adam jáne Qaraǵandy oblysy — 43 myń adam.
Buǵan deıin eń tómengi jetkiliktilik shegin esepteýdiń jańa ádistemesine sáıkes, belgilengen shekten joǵary zeınetaqy jınaqtary bar azamattardyń sany 30 myńnan sál asatynyn jazǵan edik.
