BJZQ zeınetaqy aktıvteri bir jylda 1,6 trln teńgege artty

ASTANA. QazAqparat – Biryńǵaı jınaqtaýshy zeınetaqy qorynyń zeınetaqy aktıvteri bir jylda 1,6 trln teńgege ósti. Bul týraly búgin Úkimet otyrysynda QR Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Biryńǵaı jınaqtaýshy zeınetaqy qorynyń zeınetaqy aktıvteri bir jylda 1,6 trln teńgege nemese 12,1 paıyzǵa ulǵaıyp, 2022 jyldyń sońynda 14,6 trln teńgeni qurady. 2022 jyly ınvestıtsııalyq kiris kólemi - 914,1 mlrd teńge, zeınetaqy jarnalary – 1 728 mlrd teńge, zeınetaqy tólemderi – 260,8 mlrd teńge, merziminen buryn alý somasy 896,3 mlrd teńge boldy», - dedi Ǵalymjan Pirmatov.

Onyń dereginshe, 2022 jyly zeınetaqy aktıvteriniń kiristiligi 6,55 paıyzǵa jetti.

«Zeınetaqy aktıvteriniń shoǵyrlandyrylǵan sátten bastap jınaqtalǵan kiristiligi 113,7 paıyz ınflıatsııamen salystyrǵanda 115,9 paıyzdy qurady», - dedi Ulttyq bank tóraǵasy.