BJZQ Ulttyq qordan aýdarylǵan 100 dollar týraly: Bul — tek alǵashqy esepteý
ASTANA. KAZINFORM — Biryńǵaı jınaqtaýshy zeınetaqy qory «Ulttyq qor — balalarǵa» jobasy boıynsha bala shotyna túsip jatqan soma týraly túsinik berdi.
«Ulttyq qor — balalarǵa» baǵdarlamasy boıynsha alǵashqy nysanaly talaptar men nysanaly jınaqtar tústi.
«Ulttyq qor — balalarǵa» baǵdarlamasy boıynsha BJZQ-ǵa alǵashqy nysanaly talaptar (18 jasqa deıingi balalarǵa) eseptelinip, nysanaly jınaqtaý shottaryna alǵashqy nysanaly jınaqtar (2024 jyly 18 jasqa tolatyn balalarǵa) tústi. 2024 jyldyń 1 qańtarynan bastap baǵdarlamaǵa 2023 jyldyń sońyndaǵy jaǵdaı boıynsha kámeletke tolmaǵan, Qazaqstan azamaty bolyp esepteletin barlyq balalar qatysýshy retinde tirkeldi», — dep jazylǵan qordyń resmı saıtynda.
Resmı málimet boıynsha, baǵdarlamaǵa qatysýshylardyń jalpy sany — 6 919 131 bala (qosa alǵanda, 01.01.2006 j. bastap 31.12.2023 j. deıin týylǵan balalar). Onyń ishinde 304 815 qatysýshy 2024 jyly 18 jasqa tolady (qosa alǵanda, 01.01.2006 j. bastap 31.12.2006 j. deıin týylǵan balalar).
«Olardyń barlyǵyna ótken jyl úshin Qazaqstannyń Ulttyq qorynan 100 AQSh dollary jáne 52 tsenti mólsherinde birdeı soma esepteldi. Bul tek alǵashqy esepteýler ekenin túsiný mańyzdy! Jyl saıyn bul soma Ulttyq qor aktıvteriniń ósýi jáne ınvestıtsııalyq kiris alý esebinen ulǵaıyp otyrady. Budan bólek, eseptelgen qarajat Ulttyq qordyń valıýtalyq aktıvteriniń quramynda ınvestıtsııalanýyn jalǵastyrady jáne baǵdarlamaǵa qatysýshy balalarǵa olar 18 jasqa tolǵanǵa deıin qosymsha ınvestıtsııalyq kiris ákeledi», — delingen BJZQ málimetinde.
Al 18 jasqa 2024 jyly tolatyn balalarǵa atalǵan soma olardyń BJZQ-da avtomatty túrde ashylǵan nysanaly jınaqtaý shottaryna túsýi kerek. Olar bıyldan bastap jınaqtaryn turǵyn úıge nemese bilim alýǵa kámeletke tolǵannan keıin birden paıdalanýǵa quqyly.
Nysanaly jınaqtardy kámeletke tolǵan azamat enpf.kz saıtyndaǵy óziniń jeke kabınetinde, BJZQ-nyń uıaly qosymshasynda nemese egov.kz portalynda óz betinshe teksere alady.
