BJZQ salymshylarynyń derbes derekteri urlanǵany týraly aqparatty joqqa shyǵardy
ASTANA. KAZINFORM - Biryńǵaı jınaqtyq zeınetaqy qory salymshylarynyń jeke derekteri urlanǵany týraly málimetti teriske shyǵardy.
«BJZQ» AQ GitHub saıtyndaǵy qujattarǵa belgisiz tulǵalar ornalastyrǵan qazaqstandyqtardyń derbes derekteriniń BJZQ derekqorynan shyǵýy týraly jelide taralǵan aqparattyń shyndyqqa sáıkes kelmeıtini týraly resmı málimdeme jasaıdy. BJZQ qaýipsizdik qyzmeti GitHub saıtynda ornalastyrylǵan derekterge egjeı-tegjeıli taldaý júrgizdi. Nátıjesinde, jarııalanǵan katalogta enpf.kz saıtynyń sıpattamasy ǵana kórsetilgeni anyqtaldy. Bul saıt ashyq aqparat kózi bolyp tabylady jáne onda salymshylar men alýshylardyń derbes derekteri joq», - delingen resmı málimette.
Qordyń baspasóz qyzmeti taratqan aqparat boıynsha, BJZQ kıberqaýipterge qarsy turý úshin zamanaýı jaraqtalǵan júıeni belsendi túrde qoldanady.
«BJZQ osy saladaǵy úzdik álemdik tájirıbelerdi qoldana otyryp, túrli jaǵdaılarǵa, aqparattyq qaýipsizdik qaterleri men táýekelderine ýaqytyly jaýap berip, qajetti sharalardy qoldana alady. BJZQ nátıjelerdiń obektıvtiligi men senimdiligin qamtamasyz etetin, salymshylarǵa olardyń qupııa derekterin tolyq qorǵaýǵa kepildik beretin jáne aqparattyq qaýipsizdik salasyndaǵy normatıvtik talaptardy qatań saqtaıtyn halyqaralyq standarttar men talaptarǵa sáıkes aqparattyq qaýipsizdikti basqarý júıeleriniń halyqaralyq aýdıtinen únemi ótip turady», - dep jazady qordyń baspasóz qyzmeti.
Buǵan deıin Tsıfrlyq damý, ınnovatsııalar jáne aeroǵarysh ónerkásibi mınıstrligi atalǵan oqıǵa boıynsha birneshe aqparat júıesine kezekten tys tekserý júretinin málimdegen edi.
