BJZQ onlaın qyzmet kórsetýdi damytpaq
ALMATY. QazAqparat - BJZQ onlaın qyzmet kórsetý salasyn keńeıte túspek, dep habarlaıdy QazAqparat tilshisi. 2017 jyldyń maýsymynan bastap 3 qyzmet testileýden ótkizilip jatyr.
«Atap aıtqanda, jeke zeınetaqy shotyn ashý týraly aryzdy onlaın rejimde berýge bolady. 30 maýsymnan bastap bul qyzmet tolyq jumys jasaı bastaıdy. Sondaı-aq, zeınet jasyna jetken adamdar nemese 1-2 toptaǵy múgedekter de zeınetaqy alýǵa ótinishti onlaın toltyratyn bolady. Alǵashqy ótinimder berildi. Ótinimdi óńdeýge birneshe mınýt ketedi. Sonymen qatar, ótinimniń mártebesin onlaın rejimde kórip otyrýǵa bolady», - dedi «BJZQ» basqarýshy dırektory Janar Tólegenova.
Aıta ketý kerek, mundaı qyzmetterdi onlaın rejimde alý úshin elektrondy tsıfrlyq qoltańba bolýy tıis.
Zeınetaqy tólemderin taǵaıyndaý jóninde ótinish berý úshin, ETsQ-dan basqa Qazaqstan Respýblıkasy aýmaǵynda ulttyq valıýtamen (teńge) ekinshi dárejeli bankte nemese «Qazposhta» AQ-ta ashylǵan, 20 sannan turatyn bank shoty týraly málimetti jáne ekinshi dárejeli banktiń derektemelerin kórsetý qajet. Bul rette BJZQ alýshyǵa tólemderdi taǵaıyndaý nemese aýdarý jónindegi ótinishtiń oryndalýy týraly SMS-habarlama jiberý arqyly qulaǵdar etedi.
«2017 jyldyń úshinshi toqsanynda taǵy bir servıs qoldanysqa enedi. BJZQ derekqorynda kórsetilgen salymshynyń qosymsha derektemelerine ózgerister/ tolyqtyrýlar engizý múmkin bolatyn boldy. Bul derektemelerge jeke basty kýálandyratyn qujattyń derekteri (túri, nómiri, kúni men osy qujatty bergen organ), poshtalyq nemese elektrondyq mekenjaı, telefon nómirleri (úı, jumys, uıaly) jatady», - dedi Janar Tólegenova.
