BJZQ-nyń burynǵy basshysyn qamaýda ustaý merzimi uzartyldy
ALMATY. QazAqparat - BJZQ-nyń burynǵy basshysy Rýslan Erdenaevty qamaýda ustaý merzimi qazan aıynyń 28-ine deıin uzartyldy. Bul týraly Almaty qalalyq sotynyń baspasóz qyzmetinen málim etti, dep habarlaıdy QazAqparat tilshisi.
Buǵan deıin Almaly aýdandyq sotynyń qaýlysymen Rýslan Erdenaev Musa Bahytov, Baqytjan Kenjebaev, A.Naızaǵarındi qamaýda ustaý merzimi 2017 jyldyń 28 qyrkúıegine deıin uzartylǵan.
Eske sala keteıik, Almaly aýdandyq soty 2017 jyldyń 9 qańtarynda «BJZQ» AQ eks-tóraǵasy Rýslan Erdenaevqa, «BJZQ» AQ táýekelderdi basqarý departamentiniń basshysy Musa Bahytovqa, «Alataý Munaı Altyn» AQ baqylaý keńesiniń tóraǵasy Baqytjan Kenjebaevqa, «Býzgýl Argým» JShS dırektory A.Naızaǵarınge qatysty bultartpaý sharasyn taǵaıyndaǵan bolatyn.
Sotqa deıingi tergeý oryndary R.Erdenaev pen ózge de tulǵalarǵa menshikke qatysty QR QK 189 babynyń 4 tarmaǵy boıynsha aýyr qylmys jasady dep aıyp taǵyp otyr.
Aıta keteıik, jyl basynda Ulttyq qaýipsizdik komıtetiniń Almaty qalasyndaǵy departamenti BJZQ-nyń quny 5 mlrd teńge bolatyn kelisimshartyn teksergen bolatyn. Ulttyq banktiń qatysýymen «Biryńǵaı jınaqtaýshy zeınetaqy qory» AQ-nyń áreketin tekserý ótken jyldyń 21 jeltoqsanynan bastalǵan.
