BJZQ «Nurbankti» sotqa berip, 120,4 mln teńge dıvıdend óndirip aldy

ASTANA. KAZINFORM – «Nurbank» AQ Biryńǵaı jınaqtaýshy zeınetaqy qoryna 240,8 mln teńge dıvıdend tólemeı kelgen. Іstiń mán-jaıyna úńilgen edik.

— Biryńǵaı jınaqtaýshy zeınetaqy qory — «Nurbank» AQ-nyń 120 398 artyqshylyq aktsııasynyń ıesi. Jyl saıyn qor bankten joǵaryda atalǵan artyqshylyq aktsııalary boıynsha 120 398 000 teńge mólsherinde, ıaǵnı 1000 teńge/1 artyqshylyqty aktsııa esebinen dıvıdendter (ınvestıtsııalyq kiris) alyp otyrdy. Alaıda 2023 jyly bank qorǵa 2022 jylǵa dıvıdend tólegen joq. Oǵan sebep retinde Qarjy naryǵyn retteý jáne damytý agenttiginiń № 21 qaýlysy sheńberinde kózdelgen dıvıdendter tóleý jónindegi shekteý sharttaryn alǵa tartty. Óıtkeni, bank — Qazaqstan Respýblıkasy bank sektorynyń qarjylyq turaqtylyǵyn qamtamasyz etý baǵdarlamasynyń qatysýshysy, — delingen agenttik joldaǵan saýaldyń jaýabynda.

Osy oraıda qor bankti sotqa bergen jáne banktiń qor aldyndaǵy dıvıdendter boıynsha bereshegi 240,8 mln teńge, odan bólek qor 25,8 mln teńge turaqsyzdyq aıybyn talap etti. Sot talqylaýy byltyr qarashadan bıyl aqpanǵa deıin jalǵasty, sot sheshimi 5 aqpanda shyqty.

— Almaty qalasynyń mamandandyrylǵan aýdanaralyq ekonomıkalyq soty qordyń talabyn Qarjy naryǵyn retteý jáne damytý agenttigi basqarmasynyń № 21 qaýlysyna saı dıvıdendter tóleý boıynsha shekteý sharttarynyń bolýyna baılanysty ishinara qanaǵattandyrdy. Sot «Biryńǵaı jınaqtaýshy zeınetaqy qorynyń» paıdasyna 2022 jylǵy dıvıdendter somasyn tolyq mólsherde, shamamen 120,4 mln teńge kóleminde óndirip berdi. Talaptyń qalǵan bóligin qanaǵattandyrýdan bas tartty, — dep habarlaıdy qordan.

Aqparatta aıtylǵandaı, bankten óndirilgen soma salymshylardyń shotyna jiberiledi.

— Qoldanystaǵy zańnamaǵa sáıkes, «Nurbank» AQ-dan «Biryńǵaı jınaqtaýshy zeınetaqy qory» aktsıonerlik qoǵamynyń paıdasyna óndirip alynǵan artyqshylyqqa ıe aktsııalar boıynsha 120 398 000 teńge mólsherindegi dıvıdendter kiris retinde tanylyp, salymshylardyń shottaryna esepteledi, — dep túsindirilgen resmı málimdemede.

Aıta ketsek, Memleket basshysy Qasym-Jomart Toqaev bıyl Úkimettiń keńeıtilgen otyrysynda biryńǵaı jınaqtaýshy zeınetaqy qory qarjysyn strategııalyq jobalarǵa tartý týraly da pikir bildirgen edi.

Sondaı-aq agenttik tilshisi memleket Biryńǵaı jınaqtaýshy zeınetaqy qoryndaǵy qazaqstandyqtardyń aqshasyn Ulttyq bank arqyly qalaı basqaryp otyrǵanyna sholý jasady. 

Odan bólek, Qarjy naryǵyn retteý jáne damytý agenttiginiń ókili BJZQ-daǵy aqshasy azaıyp qalǵanyna shaǵymdanǵan salymshylarǵa keńes berdi.