BJZQ-nyń jańa jetkiliktilik mólsheri erteń jarııalanady — vıtse-mınıstr
ASTANA. KAZINFORM — Eńbek jáne halyqty áleýmettik qorǵaý mınıstriniń orynbasary Vıktorııa Shegaı zeınetaqy jınaǵyndaǵy aqshanyń jańa jetkiliktilik mólsheri qashan jarııalanatynyn aıtty.
— Qaýly resmı jarııalanǵannan keıin BJZQ jetkiliktilik mólsherin eseptep, kúntizbedegi 10 kún ishinde jarııalaý kerek. 25 mamyrda qaýly shyqty dep eseptesek, erteń-aq degen sóz, — dedi vıtse mınıstr Senat kýlýarynda.
Buǵan deıin Eńbek jáne halyqty áleýmettik qorǵaý mınıstri Asqarbek Ertaev eldegi BJZQ jınaǵynyń jetkilikti shegi boıynsha engizilgen ózgeriske qatysty túsinik bergenin jazǵan edik.
— Eńbek mınıstrligi óz quzyreti sheginde erejelerge túzetýler engizýmen aınalysty. Qoldanystaǵy formýla 9 kórsetkishten — eń tómengi jalaqydan, eń tómengi zeınetaqydan jáne basqa da kórsetkishten turdy. Jańa formýla 5 kórsetkishten turady. Onda 9% jyldyq tabystylyq mólsherlemesi, aı saıynǵy tólemder boıynsha jyldyq ındeksteý mólsherlemesi jáne óz de kórsetkishter qamtyldy. Endi erejege engizilgen ózgeriske sáıkes, zańnama aıasynda BJZQ 10 kún ishinde 20-dan 63 jasqa deıingilerdi qamtıtyn jáne árbir jasqa arnalǵan tıisti jetkiliktilik shegin anyqtaıtyn esep-qısapty usynady. Bul esepteýlerdi atalǵan qor iske asyryp jatyr. Bizge bul esepteýler áli usynylmady, — degen vedomstvo basshysy.
