BJZQ-nyń Air Astana-ǵa aqsha salǵany qate boldy ma – Ulttyq bank jaýaby
ASTANA. KAZINFORM – Ulttyq banktiń Monetarlyq operatsııalar departamentiniń dırektory Nurjan Tursynhanov Biryńǵaı jınaqtaýshy zeınetaqy qorynyń aqshasyn Air Astana-ǵa salýdy nátıjesi týraly pikir bildirdi.
- BJZQ aqshasynyń bir bóligin Air Astana aktsııasyna ınvestıtsııalanǵan edińizder. Qazir bul kompanııanyń aktsııalary túsip ketti. Osy ınvestıtsııanyń sátsiz bolǵanyn moıyndaısyzdar ma, - dep surady jýrnalıst Senatta ótken dóńgelek ústelden keıin.
Nurjan Tursynhanov ınvestıtsııanyń tabystylyǵy uzaq merzimde aıqyndalatynyn alǵa tartty.
- Investıtsııalyq qyzmetti naqty bir qarjy quralymen ǵana ólsheýge bolmaıdy. Óz sátinde tabysty quraldar da, tabysy azyraq quraldarda bolady. Bul jumysty belgili kezeńde jáne portfelder jıyntyǵynda qaraý kerek. Iá, Air Astana-ǵa ınvestıtsııa salǵanbyz. Ol ınvestıtsııa aktsııaǵa salyndy. Al aktsııalardyń ózi qubylyp turatynyn túsiný kerek. Bárimiz Air Astana-nyń qyzmetin tutynyp júrmiz, tanyspyz. Kompanııa tabysty jumys istep kele jatqanyn kórip otyrmyz. Iá, aktsııasynyń qubylatyn kezeńderi bar, - dedi ol.
Nurjan Tursynhanov atalǵan ınvestıtsııa uzaq merzimdi ekenin eske saldy.
- Jalpy ınvestıtsııalar portfelin alyp qarasaq, úlesi 0,1 paıyz ǵana shyǵar. Sondyqtan naqty bir quraldyń belgili bir ýaqytta quldyrap ketkenine qarap ınvestıtsııanyń qanshalyqty sátti ne sátsiz bolǵanyn baǵalaýǵa bolmaıdy. Men jalpy portfeldi baǵalaı alamyn. Jalpy portfel aıtarlyqtaı tabysty, - dedi Ulttyq bank ókili.
Buǵan deıin Ulttyq bank tóraǵasynyń orynbasary Aqyljan Baımaǵambetov Biryńǵaı jınaqtaýshy zeınetaqy qorynyń aqshasy qandaı jobalarǵa ınvestıtsııalanatynyn aıtqan edi. Sondaı-aq Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva Senatta ótip jatqan dóńgelek ústelde BJZQ-daǵy qarjysy azaıyp qalǵanyna jıi shaǵymdanatyn salymshylar týraly pikir bildirgen edi.
Bıyl bankterge BJZQ-dan qansha aqsha beriletini týraly da jazǵan edik.