BJZQ qarjysy salynǵan Ázerbaıjan banki qaryzyn 15 jyl ishinde tóleıdi
«Jalpy aıtqanda biz bul aqshany joǵaltqan joqpyz. Eger bank, shynynda da, bankrotqa ushyrasa nemese qaryzdyń qaıta ózgerispen tólenýin nesıe berýshilerdiń basym kópshiligi qoldamaǵanda aqshany joǵaltý qaýpi týyndaıtyn edi. Búgingi tańda banktiń bul oblıgatsııalary Ázerbaıjannyń derbes oblıgatsııalaryna aýystyrylǵan. Qorytyndysynda 3,5 paıyzdyq mólsherememen 250 mln AQSh dollar aqshanyń qaıtarymy 15 jylǵa uzartyldy. Bul qaǵazdar ótimdi bolyp tabylady», - deıdi QR Qarjy mınıstri Baqyt Sultanov Parlament Májilisiniń otyrysynda.
Onyń aıtýyna qaraǵanda, qazaqstandyqtar úshin joǵaryda aıtylǵan qarajat joǵaldy deý artyq áńgime.
«Biz qarjyny joǵalttyq dep aıtýǵa bolmaıdy. Iá, aıyrmashylyq bar. Biraq negizgi somany biz joǵaltqan joqpyz», - deıdi ol.
Eske sala keteıik, Qazaqstannyń biryńǵaı jınaqtaýshy zeınetaqy qory 71,3 mlrd teńge ınvestıtsııa salǵan Ázerbaıjannyń halyqaralyq banki bankrotqa ushyraý týraly sotqa ótinish bergen edi. Qazirgi kezde atalǵan qarjy mekemesi syrtqy qaryz boıynsha tólem júrgizýdi toqtatyp, nesıe berýshilermen banktiń qurylymyn qaıta ózgertý boıynsha kelissóz júrgizip jatyr. Qarjylyq problema Ázerbaıjannyń ulttyq valıýtasynyń devalvatsııasy men munaı baǵasynyń quldyraýy saldarynan týyndaǵan edi.
