BJZQ qarjysy salynǵan vagondar qashan qurastyrylady
ASTANA. KAZINFORM –Ónerkásip jáne qurylys mınıstri Qanat Sharlapaev Úkimet otyrysynda 2025 jyly Astana qalasynda «Shtadler» jolaýshylar vagondary qurastyrylatyny týraly aıtty.
Mınıstr BJZQ-dan Stadler jobasyna bólingen qarajat qashan óndiriske aınala bastaıtynyn aıtty
«Eldegi temirjol parki shamamen 139 myń birlikti quraıdy. Onyń ortasha tozý deńgeıi – 55 protsent. Osyǵan oraı, temirjol parkin jańartý jáne ımportty almastyrý maqsatynda jańa jobalardy iske qosý jumystary júrgizilýde. Máselen, jylyna 6 myń júk vagondary men tsısternalar shyǵaratyn «TeksolTrans» zaýyty 2025 jyldyń birinshi toqsanynda tolyqqandy óndirisin bastaıdy. 2025 jyly Astana qalasynda «Shtadler» jolaýshylar vagondarynyń óndirisi iske qosylady», - dedi mınıstr.
Sondaı-aq, Qanat Sharlapaev Semeıdegi jobaǵa toqtaldy.
«Semeı mashına jasaý zaýyty» jylyna 600 birlik jartylaı vagon óndirisin uıymdastyrý boıynsha jumys júrgizip, «Railcast Systems» bandaj óndirý jobasy iske asyrylýda. Sondaı-aq, jyl sońynda Qostanaı oblysynda prýjınalar shyǵaratyn zaýyt iske qosylady dep kútilýde. Al 2025 jyly «Vostokmashzavod» orta jáne iri vagon qańqasyn quıýdy josparlaýda», - dedi ol.
Eske salsaq, Shveıtsarııanyń Stadler kompanııasy elimizde 2030 jylǵa deıin 537 zamanaýı jolaýshylar vagonyn shyǵarýdy josparlap otyr.
Keıin bul jobaǵa Biryńǵaı jınaqtaýshy zeınetaqy qorynyń aqshasy da tartylatyny belgili bolǵan.
