BJZQ-dan zańsyz aqsha shyǵarǵan tis dárigerleriniń múlki tárkilenip jatyr

ASTANA. KAZINFORM — Rorsche, Escalade, BMW – VIP sanattaǵy osyndaı kólikter tis dárigerlerinen tárkilenip jatyr. Bul týraly Jibek joly telearnasynyń jańalyqtar qyzmetinde aıtty.  

Taıaýda «Otbasy bank» pen Densaýlyq saqtaý mınıstrligi biryńǵaı jınaqtaýshy zeınetaqy qorynan azamattardyń jınaǵynyń bir bóligin tis emdeýge alýǵa shekteý qoıýǵa sheshim shyǵarǵan.

Óıtkeni sońǵy úsh jylda Zeınetaqy qorynan stomatologııa qyzmetine 435 mlrd teńge aýdaryp, onyń 200 mlrd teńgesi zańsyz jolmen shyǵarylǵany anyqtalǵan.

Tekseris kezinde kúnine 70 «patsıent» qabyldaǵan klınıkalar bar bolyp shyqqan.

Qarjylyq monıtorıng agenttigi Atyraýda osyndaı mahınatsııa júrgizgen 5 qylmystyq toptyń áreketin áshkerelegen.

Kúdiktiler zeınetaqy qorynan shyǵarylǵan qarjynyń 600 mln teńgesin jymqyrǵan. Oǵan qymbat kólikter men baǵaly zergerlik buıymdar, kommertsııalyq nysandar, páter men jer telimder alypty. 

Buǵan deıin agenttik osyndaı 30-dan asa stomatologııalyq klınıkanyń qylmysyn anyqtaǵan.