BJZQ-dan zańsyz 200 mlrd teńge shyǵarǵan 42 stomatologııalyq klınıka tergelip jatyr

ASTANA. KAZINFORM — Qarjylyq monıtorıng agenttigi «Biryńǵaı jınaqtaýshy zeınetaqy qory» AQ-dan azamattardyń zeınetaqy jınaqtaryn zańsyz shyǵarý derekteri boıynsha stomatologııalyq klınıkalardyń basshylary men ózge de tulǵalarǵa qatysty sotqa deıingi tergep-tekserýdi jalǵastyryp jatyr.

Agenttik málimetinshe, zeınetaqy jınaqtary stomatologııalyq qyzmetter kórsetý týraly formaldy sharttar jasasý jáne keıinnen jalǵan medıtsınalyq qujattar usyný arqyly shyǵarylǵan.

Atalǵan «qyzmet» úshin kúdiktiler alynǵan qarajattyń 10%-dan 20%-ǵa deıingi mólsherinde zańsyz syıaqy ustap otyrǵan.

Qylmystyq shemaǵa 42 stomatologııalyq klınıka tartylǵan. Aldyn ala málimetterge sáıkes, jalpy somasy 200 mlrd teńgeden astam qarajat zańsyz shyǵarylǵan.

- Qylmystyq jolmen alynǵan tabystarǵa kúdiktiler elıtalyq jyljymaly jáne jyljymaıtyn múlik satyp alǵan, sondaı-aq qarajatty jasyrý maqsatynda múlikti úshinshi tulǵalardyń atyna rásimdep, jańa stomatologııalyq klınıkalar ashqan.

Qazirgi ýaqytta 11 kúdikti eki aı merzimge qamaýǵa alynǵan, al úsh adamǵa qatysty úıqamaq túrindegi bultartpaý sharasy tańdalǵan, - dep jazdy agenttikten.

Sonymen qatar júıeli túrde zańsyz syıaqy alý maqsatynda medıtsınalyq mekemelerdiń birqatar dárigerleri dárigerlik-konsýltatsııalyq komıssııalardyń (DKK) jalǵan qorytyndylaryn bergeni anyqtalǵan. Bul epızodtar boıynsha kúdiktilerden alynǵan qarajattyń jalpy somasy 30 mln teńgeni qurady.

Atalǵan faktiler boıynsha birqatar sotqa deıingi tergep-tekserý amaldary bastalǵan.

Buǵan deıin habarlanǵandaı, óz zeınetaqy aýdarymdaryn alǵan azamattar qylmystyq qýdalaý aıasyna túspeıdi.

Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.

Aıta keteıik, BJZQ-dan 46 mlrd teńge jymqyrǵan jalǵan stomatologııalardyń bir ıesi ustaldy.