BJZQ-dan beriletin zeınetaqy tólemderi jeke tabys salyǵynan bosatyldy
ASTANA. KAZINFORM — Jyl basynan beri BJZQ-dan beriletin zeınetaqy tólemderin jeke tabys salyǵynan bosatý jónindegi norma kúshine endi.
Atap aıtqanda, 2025 jylǵy 18 shildede Memleket basshysy jańa Salyq kodeksine qol qoıdy.
Osy oraıda jańa Salyq kodeksi Qazaqstan Respýblıkasy rezıdentteri úshin BJZQ-dan zeınetaqy tólemderinen jeke tabys salyǵyn ustaý tetigin joıdy.
- Ol BJZQ-dan Qazaqstan Respýblıkasynyń beırezıdentterine tólenetin zeınetaqy tólemderin qospaǵanda, barlyq tabys, turǵyn úıge nemese emdelýge arnalǵan birjolǵy zeınetaqy tólemderi túrindegi kiristerdi 2026 jylǵy 1 qańtardan bastap jeke tabys salyǵynan (JTS) bosatý eskerilgen, - delingen BJZQ aqparatynda.
Burynǵy norma
Osyǵan deıin qoldanysta bolǵan Salyq kodeksine sáıkes, Biryńǵaı jınaqtaýshy zeınetaqy qorynan tólenetin birjolǵy zeınetaqy tólemderi tólem kózinen 10% mólsherleme boıynsha jeke tabys salyǵy (JTS) ustalatyn kiris túrine jatty. Zeınetaqy jarnalary jeke zeınetaqy shottaryna salyq salynǵanǵa deıin aýdarylady. Al jeke tabys salyǵy tólemder júzege asyrylǵan kezde ustaldy. JTS ustaý mindetti zeınetaqy jarnalary (MZJ), mindetti kásiptik zeınetaqy jarnalary (MKZJ), erikti zeınetaqy jarnalary (EZJ) esebinen qalyptasqan barlyq zeınetaqy tólemderi túrleri boıynsha jıyntyq túrde júrgizildi.
Turǵyn úıge nemese emdelýge birjolǵy zeınetaqy tólemderin paıdalanǵan kezde JTS ustalyp keldi. Bul rette alýshynyń tańdaýyna ony ustap qalýdyń eki joly usynylady: BZT alǵan kezde birden nemese zeınetaqy alatyn kezge deıin keıinge qaldyrý.
2026 jyldyń qańtarynan kúshine engen norma
Endi JTS zeınetaqy tólemderiniń barlyq túrinen ustalmaıdy. Biraq munyń Qazaqstan Respýblıkasynyń rezıdenti retinde sanalmaıtyn azamattarǵa qatysy joq. Sondaı-aq, JTS birjolǵy zeınetaqy tólemderinen de ustalmaıdy.
2026 jylǵy 1 qańtardan bastap turǵyn úı jaǵdaıyn jaqsartý nemese emdelý maqsatynda paıdalanylǵan birjolǵy zeınetaqy tólemderinen ustalýy tıis, biraq zeınetke shyqqanǵa deıin keıinge qaldyrylǵan jeke tabys salyǵy boıynsha eseptelgen mindettemeler de joıyldy. Osy jyldan bastap jańa Salyq kodeksiniń engizilýine baılanysty salymshy JTS-ty buǵan deıin tólep qoıǵan bolsa, ol qaıtarylmaıdy. Al keıinge qaldyrylǵan JTS boıynsha mindettemelerdiń kúshi joıylady.
Aıta keteıik, 2025 jyly el turǵyndary turǵyn úı jaǵdaılaryn jaqsartý úshin Biryńǵaı jınaqtaýshy zeınetaqy qorynan 221,4 mlrd teńge aldy. https://kaz.inform.kz/news/2025-zhili-elturgindari-baspanalarin-zhaksartu-ushn-zeynetaki-korinan-kansha-karazhat-aldi-b83dcd/
Sonymen qatar budan bylaı zeınetaqy jınaǵyna plastıkalyq operatsııa jasaýǵa tyıym salyndy.
Eske salsaq, bıyl kúzde «Otbasy bank» pen Densaýlyq saqtaý mınıstrligi biryńǵaı jınaqtaýshy zeınetaqy qorynan azamattardyń jınaǵynyń bir bóligin tis emdeýge alýǵa shekteý qoıýǵa sheshim shyǵarǵan.
Al 2025 jylǵy 4 jeltoqsannan bastap enpf-otbasy.kz platformasy Birjolǵy zeınetaqy tólemi esebinen oftalmologııalyq qyzmetti tóleýge arnalǵan ótinishti qabyldamaıdy.