BJZQ-dan aı saıyn qosymsha tólemder beriletini týraly aqparat - feık
ASTANA. QazAqparat – Jańalyqtar taratatyn sheteldik agregator saıttarynyń biri Biryńǵaı jınaqtaýshy zeınetaqy qoryna (BJZQ) silteme jasaı otyryp, bıyl aldaǵy aıdyń 1-nen bastap Qazaqstanda halyqtyń belgili bir (jeńildikke ıe) sanatyna qosymsha aı saıynǵy aqshalaı tólemder engiziletini týraly aqparat shyndyqqa janaspaıdy, dep habarlaıdy QazAqparat Qordyń arnaıy saıtyna silteme jasap.
«Zeınet jasyna tolǵan adamdarǵa BJZQ-dan beriletin zeınetaqy tólemderi Qazaqstan Respýblıkasy Úkimetiniń 2013 jylǵy 2 qazandaǵy № 1042 qaýlysymen bekitilgen BJZQ-dan beriletin zeınetaqy tólemderiniń mólsherin esepteýdi júzege asyrý ádistemesine sáıkes belgilengen keste boıynsha aı saıyn júzege asyrylady. Sondaı-aq, merzimsiz ýaqytqa birinshi jáne/nemese ekinshi toptaǵy múgedektiktiń belgilenýine baılanysty jalpyǵa birdeı belgilengen zeınet jasyna tolǵanǵa deıin BJZQ-dan keste boıynsha tólemder alý múmkindigi kózdelgen», delingen habarlamada.
Atalǵan ádisteme BJZQ-dan ótken jylǵy aı saıynǵy zeınetaqy mólsherin jyl saıyn zeınetaqy tólemderin ındeksteýdiń 5% mólsherlemesine ulǵaıtýdy kózdeıdi, dep tolyqtyrdy zeınetaqy qory.
Qordaǵy jeke zeınetaqy shotyndaǵy zeınetaqy jınaqtaryn BJZQ saıtyndaǵy (www.enpf.kz) Jeke kabınette nemese BJZQ uıaly qosymshasynda, sondaı-aq elektrondyq úkimet (www.egov.kz) saıtynan baqylaýǵa bolady.
Qor ókilderi qazaqstandyqtardy tek resmı derekkózderden alynǵan, senimdi aqparatqa ǵana sený kerektigin eskertedi.
