BJZQ-dan 46 mlrd teńge jymqyrǵan: Jalǵan stomatologııalardyń bir ıesi ustaldy

ASTANA. KAZINFORM – Qarjylyq monıtorıng agenttigi BJZQ qarajatyn zańsyz shyǵarý boıynsha qylmystyq shemalardy uıymdastyrdy degen jalǵan stomatologııalyq klınıkalardyń biriniń ıesin ustady.

Áńgime Aslan Dúısenov týraly bolyp otyr. Tergeý derekteri boıynsha, onyń kinási tolyq dáleldengen.

– Birinshiden, onyń protsessýaldyq mártebesi – «kúdikti». Oǵan syrttaı aıyptaý taǵylyp, sot bultartpaý sharasy retinde qamaýǵa alý týraly sheshim shyǵardy jáne izdeý jarııalanǵan bolatyn. Qazirgi ýaqytta kúdikti ustaldy, sot sanktsııany rastady. Tergeý barysynda onyń tórt klınıka ashýǵa qatysy bary, sondaı-aq zańsyz áreketter arqyly alynǵan qarajattyń tolyq kólemi dáleldendi, – dedi Qarjylyq monıtorıng agenttigi tóraǵasynyń orynbasary Jeńis Elemesov Senat kýlýarynda.

Buǵan deıin agenttik jalǵan stomatologııa ashqan A.Q. Dúısenovke, Ǵ. Imanbaevqa jáne E.B. Eleýshevke izdeý jarııalaǵan bolatyn.

Olar 46 mlrd teńgeden astam qarajatty BJZQ zańsyz shyǵarý maqsatynda qylmystyq shemalardy uıymdastyrdy degen kúdikke ilingen. Bul maqsatta olar tis emdeý qyzmeti kórsetilgendeı jalǵan medıtsınalyq qujattardy rásimdegen. Olar Mańǵystaý jáne Atyraý oblystaryndaǵy 7 stomatologııalyq klınıkany paıdalanǵan. Atalǵan mekemeler is júzinde eshqandaı medıtsınalyq qyzmet kórsetpegen.

Al «Otbasy bank» pen Densaýlyq saqtaý mınıstrligi biryńǵaı jınaqtaýshy zeınetaqy qorynan azamattardyń jınaǵynyń bir bóligin tis emdeýge alýǵa shekteý qoıýdy uıǵardy.