BJZQ-daǵy shekti mólsherden artyq qarajatyn alǵan azamattar salyqtan bosatylady

ASTANA. KAZINFORM – Biryńǵaı jınaqtaýshy zeınetaqy qorynan alynǵan zeınetaqy qarajatyna qatysty salyq mindettemelerin oryndaýdy zeınetkerlikke shyqqannan keıingi kezeńge qaldyrǵan azamattar salyqtan bosatylady. Bul týraly Májilistiń jalpy otyrysynda Ulttyq ekonomıka birinshi vıtse-mınıstri Azamat Ámrın aıtty.

Otyrysy barysynda Májilis depýtaty Nurgúl Taý Salyq kodeksiniń jobasy men oǵan ilespe zań jobasy aıasynda, atap aıtqanda Áleýmettik kodekste Biryńǵaı jınaqtaýshy zeınetaqy qorynan beriletin zeınetaqy qarajatynan, onyń ishinde birjolǵy zeınetaqy tólemderinen jeke tabys salyǵyn toqtatý kózdelip otyrǵanyn aıtty. 

- Alaıda, kóptegen azamat BJZQ-dan alynǵan zeınetaqy qarajatynan jeke tabys salyǵyn tólegeni bárimizdiń esimizde. Azamattardyń basqa bóligi osy qarajat boıynsha ózderiniń salyq mindettemelerin oryndaýdy zeınetkerlikke shyqqannan keıingi kezeńge qaldyrdy. Osyǵan baılanysty BJZQ-dan qarajat alý kezinde salyq tólegen azamattardyń sany qansha jáne tólengen jeke tabys salyǵyn olarǵa qaıtarý josparlanyp otyr ma?, - dep suraǵan edi.

Saýalǵa jaýap bergen birinshi vıtse-mınıstr BJZQ-dan alynǵan zeınetaqy qarajatyna qatysty salyq mindettemelerin oryndaýdy zeınetkerlikke shyqqannan keıingi kezeńge qaldyrǵan azamattar salyqtan bosatylatyndyǵyn aıtty.

- Al tólep qoıǵandar úshin salyq tólemderi qaıtarylmaıdy. Olardyń sanyna qatysty naqty derekter qolymda joq. Ruqsat bolsa, jazbasha bereıik, - dedi Azamat Ámrın.

Aıta keteıik, búgin Premer-mınıstrdiń orynbasary – Ulttyq ekonomıka mınıstri Serik Jumanǵarın Májilistiń jalpy otyrysynda Salyq kodeksiniń jobasyndaǵy sońǵy ózgeristerdi atady.