BJZQ-da 280 myń marqumnyń 45,8 mlrd teńgege jýyq jınaǵy suraýsyz jatyr

ASTANA. KAZINFORM – Biryńǵaı jınaqtaýshy zeınetaqy qory Kazinform saýalyna joldaǵan jaýapta qaıtys bolýyna baılanysty qorǵa jınaqtaǵan zeınetaqysyn tolyq kólemde alyp úlgermegen azamattardyń sanyn aıtty.

- Qolda bar sońǵy málimetterge súıensek, BJZQ-da mindetti zeınetaqy jarnalary esebinen zeınetaqy jınaqtary bar, biraq qaıtys bolǵan jáne onyń zeınetaqy shotyndaǵy qarajaty mura retinde talap etilmegen shamamen 280 myń salymshy bar. Bul salymshylardyń shottaryndaǵy qarajat mólsheri – 45,8 mlrd teńgege jýyq, - dep jazylǵan jaýapta.

BJZQ mamandary zeınetaqy jınaqtaryn sottyń sheshimimen ıesiz múlik retinde tanyp, kommýnaldyq menshikke ótkizý úrdisi tek 2019 jyldan bastaý alatynyn aıtady.

- Osy oraıda, 2019-2024 jyldar aralyǵynda 330 salymshy boıynsha kommýnaldyq menshikke ıesiz múlik retinde ótken zeınetaqy jınaqtarynyń jalpy somasy 36 mıllıon teńgege jýyq, - dep jazady BJZQ mamandary.

BJZQ-daǵy jınaqtary ıesiz múlik retinde tanylǵan shottardyń óńirler boıynsha kórsetkishi mynandaı:

- ShQO jáne Abaı oblysy – 279;

- Pavlodar oblysy - 47,

- Aqmola oblysy – 1;

- Qaraǵandy oblysy – 1;

- Qostanaı oblysy – 1,

- SQO – 1.

Aıta keteıik, Áleýmettik kodekstiń 34, 220, 2021, 223- baptary boıynsha, adam qaıtys bolsa, onyń BJZQ-daǵy ıgerip úlgermegen jınaǵy muraǵa qalady. Al Azamattyq kodekstiń 1083-babynda qaıtys bolǵan adamnyń zańdy murageri anyqtalmasa, ıeligindegi múlik ıesiz múlik dep tanylyp, kommýnaldyq menshikke aýysatyny aıtylǵan.

Buǵan deıin Biryńǵaı jınaqtaýshy zeınetaqy qorynyń 226 mlrd teńgesi bankterdiń uzaqmerzimdi oblıgatsııalaryna ınvestıtsııalanǵanyn jazǵan edik.