BJZQ arqyly 46 mlrd teńge jymqyrdy degen kúdikpen 3 klınıkanyń ıesine izdeý salyndy
ASTANA. KAZINFORM — Qarjylyq monıtorıng agenttigi jalǵan stomatologııalyq klınıkalardyń ıelerin izdestirip jatyr.
Agenttik kúdiktilerdiń esimderin de jarııalady. Olar Aslan Qambaruly Dúısenov — 01.04.1992 j. t., Gabbas Imanbaev — 18.05.1998 j. t., Esimhan Baıandıevıch Eleshev — 11.09.1987 j. t.
— Atalǵan azamattar 46 mlrd teńgeden astam qarajatty BJZQ zańsyz shyǵarý maqsatynda qylmystyq shemalardy uıymdastyrdy degen kúdikke ilingen. Bul maqsatta olar tis emdeý qyzmeti kórsetilgendeı jalǵan medıtsınalyq qujattardy rásimdegen. Olar Mańǵystaý jáne Atyraý oblystaryndaǵy 7 stomatologııalyq klınıkany paıdalanǵan. Atalǵan mekemeler is júzinde eshqandaı medıtsınalyq qyzmet kórsetpegen, — delingen vedomstvo habarlamasynda.
QMA baspasóz qyzmetiniń málimetinshe, Dúısenov A.Q., Imanbaev G., Eleýshev E.B.-ke qatysty bultartpaý sharasy retinde qamaýǵa alý qoldanyldy.
— Aıyptalýshylardyń biri — Dúısenov A.Q. buryn polıtsııa qyzmetkeri bolǵan, alaıda teris sebepter boıynsha jumystan shyǵarylǵan. 2016 jyly ol Qylmystyq kodekstiń 105-baby («Óz-ózine qol jumsaýǵa deıin jetkizý») jáne 362-baby («Qyzmettik ókilettikterin asyra paıdalaný») boıynsha aýyr qylmys jasaǵany úshin 5 jylǵa bas bostandyǵynan aıyrylǵan. Іzdeýde júrgen tulǵalardyń ornalasqan jeri týraly qandaı da bir aqparat bilseńiz, Qarjylyq monıtorıng agenttigine tómendegi nómir boıynsha habarlaýyńyzdy suraımyz: +7 (7172) 70 84 78 — kezekshi bólim. Syıaqy men anonımdilikke kepildik beriledi, — dep atap ótti agenttik.
Budan buryn BJZQ-dan zańsyz aqsha shyǵarǵan tis dárigerleriniń múlki tárkilenip jatqany anyqtaldy.
Taıaýda «Otbasy bank» pen Densaýlyq saqtaý mınıstrligi biryńǵaı jınaqtaýshy zeınetaqy qorynan azamattardyń jınaǵynyń bir bóligin tis emdeýge alýǵa shekteý qoıýǵa sheshim shyǵarǵan.