BJZQ áleýmettik jelilerdegi alaıaqtyq áreketter týraly eskertedi
«Sońǵy kezderi áleýmettik jelilerde Biryńǵaı jınaqtaýshy zeınetaqy qorynyń atynan jalǵan qoǵamdastyqtar arqyly derekterdi zańsyz jınaý men alaıaqtyq jaǵdaılar jıilep ketti. Derekter qoryndaǵy ózgerister nemese keńseniń basqa jerge kóshýi sııaqty túrli sebepterdi aıtyp, qaskúnemder derbes derekterdi berýdi suraıdy jáne jaýap bermeseńiz, jeke zeınetaqy shotyńyz jabylady dep qorqytady.
Osyǵan oraı, Sizderden qandaı jaǵdaı bolmasyn óz jeke derekterińizdi habarlamaýdy suraımyz jáne Qazaqstan Respýblıkasynyń 2013 jylǵy 21 mamyrdaǵy № 94-V «Derbes derekter jáne olardy qorǵaý týraly» zańyna sáıkes BJZQ-nyń derbes derekterdi jınaýdy jáne óńdeýdi sýbektiniń kelisimimen júzege asyratynyn eskertemiz», delingen habarlamada.
BJZQ azamattardyń derbes derekterin jınaıtyn suranystar jasamaıtyndyǵy jáne salymshylarǵa (alýshylarǵa) áleýmettik jelilerde jeke habarlamalar jiberý arqyly ótinish bildirmeıtindigi, buǵan suranysty óńdeý úshin BJZQ derekter bazasyna kirý qajettiliginiń joqtyǵyn naqtylaı ketken. Osyǵan qaramastan, salymshy jeke derekterin kórsetpeýge jáne qordyń qyzmet kórsetý ortalyǵyna ózi barýǵa tolyqtaı quqyly.
Qordyń resmı paraqshalary tek aqparat taratady, sondaı-aq salymshylarǵa (alýshylarǵa) úndeý jasaýdyń qosymsha arnasy retinde qyzmet etedi.
Áleýmettik jelilerdegi BJZQ resmı paraqshalaryna silteme qordyń www.enpf.kz veb-saıtynda ornalasqan.
Eger áleýmettik jeliler arqyly BJZQ atynan jeke derekter suralǵan jaǵdaıda, baılanys ortalyǵynyń 8 (727) 356-10-60, 8 (727) 312-15-68 telefondary arqyly qor qyzmetkerlerine, sondaı-aq Qazaqstan Respýblıkasynyń aýmaǵynda tegin qalaaralyq 1418 nómirine habarlasý usynylǵan.