BJZQ áleýmettik jelidegi qaýesetti joqqa shyǵardy
«Jaqynda áleýmettik jelide 1 qańtardan bastan zeınetaqy salymdarynyń stavkalary 15 paıyzǵa artady degen aqparat tarady. Bul aqparat shyndyqqa saı emes. Biraq, belsendi tarap jatyr. BJZQ bul aqparatty taratpaýǵa shaqyrady», - dedi BJZQ ókilderi Feısbýktegi paraqshasynda.
BJZQ baspasóz qyzmeti túsindirgendeı, 2020 jyldyń 1 qańtarynan bastap qoldanystaǵy zeınetaqy júıesine shartty jınaqtaý komponenti engiziledi.
«Bul úshin qorda derbes shartty-jınaqtaý shottary ashylady. Oǵan jumys berýshiler óz qarajattarynan 5 paıyz tóleıtin bolady. Muny jumysshylar tólemeıdi», - dedi BJZQ.
Jańa júıeniń basty tıimdiligine kelsek, eń aldymen zeınetker zeınetaqyny osy 5 paıyzdan ómirbaqı alyp turatyn bolady. Bul salym jumyskerdiń menshigine jatpaıdy. Sondyqtan ony muraǵa qaldyrýǵa bolmaıdy.
«Komponent ortaq jáne jınaqtaýshy júıeleriniń ekeýine de sáıkes keledi. Bir jaǵynan ol áleýmettik turǵydan tıimdi. Sebebi, jalaqy az alatyn adamdar da basqalarmen teń týra sondaı zeınetaqy tólemin alatyn bolady. Sonymen qatar memlekettiń qarjylyq salymdaryn qajet etpeıdi», - dedi qordan.
Osylaısha qazaqstandyqtardy zeınetaqymen qamsyzdandyrýda taǵy bir tıimdi joly paıda boldy. Al, jumyskerler úshin mindetti zeınetaqy salymdary ózgerissiz 10 paıyz kúıinshe qalady.
