BJZQ aktıvterin bank oblıgatsııalaryna ınvestıtsııalaý: 226 mlrd teńge aýdaryldy
ASTANA. KAZINFORM – Biryńǵaı jınaqtaýshy zeınetaqy qory aktıvterin ekinshi deńgeıli bankterdiń oblıgatsııalaryna ınvestıtsııalaý mehanızmi aıasynda jalpy somasy 500 mlrd teńge qarajat bólinedi, qazirgi tańda onyń 226 mlrd teńgesi aýdaryldy. Bul týraly Kazinform agenttiginiń saýalyna Ulttyq bank joldaǵan jaýapta jazylǵan.
— Zeınetaqy aktıvterin ekinshi deńgeıli bankterdiń oblıgatsııalaryna naryq sharttary boıynsha ınvestıtsııalaý mehanızmi bekitildi. Bul protsess 2024-2025 jyldary júzege asady da, jalpy somasy 500 mlrd teńgege deıin qarajat bólinedi. Qarajat 7 jylǵa deıingi merzimge jáne naryq mólsherlemelerimen beriledi jáne ol ekonomıkanyń basty salalaryndaǵy mańyzdy bıznes jobalardy qarjylandyrýǵa jumsalady. Qazir osy mehanızm aıasynda ekinshi deńgeıli bankter 7 jylǵa 226 mlrd teńgeden astam qarajat tartty, - delingen habarlamada.
Sonymen qatar, bankterdiń ekonomıkany kredıtteýine kedergi keltiretin tosqaýyldardy joıý baǵytynda da jumys júrip jatqany aıtyldy.
— Bankterdi yntalandyrý sharalary qarastyrylyp jatyr, sonyń ishinde korporatıvtik tabys salyǵy (KTS) mólsherlemesin tabys túrine baılanysty dıfferentsııalaý máselesi talqylanady. Ekonomıkany kredıtteýge yntalandyrý maqsatynda bankterdiń tabysyna qaraı KTS-tyń dıfferentsııalanǵan mólsherlemesin engizý usynyldy, - dep jazylǵan jaýapta.
Naqtyraq aıtqanda usynylyp otyrǵany:
- Korporatıvtik kredıtteýden túsken tabysqa meıilinshe az salyq salý (20%);
- Basqa tabystarǵa, sonyń ishinde tutynýshylyq kredıtteýden túsken tabysqa barynsha kóp salyq salý (25%).
Bul norma jańa Salyq kodeksi jobasy aıasynda qarastyryldy.
Kúni keshe Ulttyq bank Monetarlyq operatsııalar departamentiniń dırektory Nurjan Tursynhanov zeınetaqy shottarynda ınvestıtsııalyq tabystyń tómendeýi sebebin túsindirdi.
«Zeınetaqy jınaǵynyń bir bóligin merziminen buryn paıdalaný toqtatyla ma?» Bul saýalǵa «Biryńǵaı jınaqtaýshy zeınetaqy qory» aktsıonerlik qoǵamynyń basqarýshy dırektory Murat Sháripov jaýap berdi.