BJZQ aktıvteriniń tabystylyǵy ınflıatsııa deńgeıinen asyp tústi - QR Ulttyq banki

ALMATY. QazAqparat - 2015 jyldyń birinshi jartyjyldyǵynda Biryńǵaı jınaqtaýshy zeınetaqy qory aktıvteriniń tabystylyǵy 3,04%-dy qurap, ınflıatsııa deńgeıinen eki esege asyp tústi. Bul týraly QR Ulttyq bankiniń baspasóz qyzmeti habarlady.

Aıta keteıik, alǵashqy 6 aıda ınflıatsııa deńgeıi 1,4%-dy qurady.

QR Ulttyq banki 2015 jyldyń sońyna deıin osy kórsetkishti saqtap qalýǵa yntaly bolyp otyr. «Zeınetaqy aktıvteriniń eń tıimdi ári tabysty ınvestıtsııalaý kózi ekinshi deńgeıli bankterdiń qundy qaǵazdaryna salý boyp otyr. Osylaısha 2015 jyldyń alǵashqy jartyjyldyǵynda EDB qarjylyq quraldaryna salynǵan ınvestıtsııanyń ortasha tabystylyǵy 8,5% boldy. Bul jerde eskeretin jaıt, Ulttyq bank tek iri bankterdiń qundy qaǵazdaryna ǵana aqsha saldy», - dedi QR Ulttyq bankiniń monetarlyq operatsııa jáne aktıvterdi basqarý departamenti dırektorynyń orynbasary Rashıd Ámirov.

Aıta ketý kerek, Ulttyq banktiń satyp alǵan qundy qaǵazdarynyń 1 jyldyq ortasha tabystylyǵy 8,3%-ǵa jetti. BJZQ zeınetaqy aktıvteriniń kólemi jyl basynan beri 9,1%-ǵa ósip, 4 926,4 mlrd. teńge boldy.

Ótken jyly bul kórsetkish 6,3% bolyp, 2013 jylǵy jekemenshik zeınetaqy qorlarynynyń tabystylyǵynan 3 esege asyp tústi.

Zeınetaqy aktıvterin ınvestıtsııalaýdyń basty maqsaty - zeınetaqy aktıvteriniń saqtalýyn qamtamasyz ete otyryp, tabystylyǵyn ınflıatsııadan asyrý bolyp tabylady.