BJZQ aktıvin ınvestıtsııalaý: bankter qalaı iriktelip, qarjy qandaı shartpen berildi

ASTANA. KAZINFORM – Ulttyq bank Biryńǵaı jınaqtaýshy zeınetaqy qory aktıvterin tartý úshin ekinshi deńgeıli bankter qandaı krıterıı boıynsha iriktelgenin jáne qarjy qandaı sharttarmen berilgenin málim etti.

— BJZQ-nyń zeınetaqy aktıvterin tartýǵa menshikti kapıtal mólsheri 60 mlrd teńgeden asatyn jáne kredıttik reıtıngi «B»-den túspeıtin bankter qatysa alady, - delingen Ulttyq banktiń Kazinform agenttigi joldaǵan resmı saýalǵa jaýabynda.

Sondaı-aq bul aktıvter ekinshi deńgeıli bankterge qandaı shartpen berilgeni málim boldy. Qarjylandyrýdyń bul kózi bankterge oblıgatsııa shyǵarý arqyly kelesi sharttarmen usynyldy:

• aınalym merzimi 7 jyldan aspaýy kerek;
• ınflıatsııa deńgeıine nemese TONIA aqsha naryǵynyń ındıkatoryna baılanysty turaqty nemese ózgermeli kýpondyq syıaqy mólsherlemesi belgilenýi kerek.

Kórsetilgen stavkalardyń mólsheri oblıgatsııa ornalastyrý sátinde aıqyndalady jáne aınalys merzimi ne ınflıatsııa deńgeıi nemese TONIA aqsha naryǵynyń ındıkatory uqsas QR Memlekettik baǵaly qaǵazdarynyń kiristilik deńgeıine, sondaı-aq banktiń kredıttik reıtıngine jáne oblıgatsııalardyń aınalys merzimine baılanysty banktiń kredıttik táýekelderi úshin syılyqaqyǵa baılanysty bolady, - delingen habarlamada.

Bankterdiń qarjyny áýelgi maqsatynan bólek salaǵa, ıaǵnı ekonomıkanyń naqty sektorynan basqa jaqqa salýǵa bolmaıtyny aıtylǵan.

— Bankter tartylǵan qarajatty ınvestıtsııalyq jobalardy kredıtteýge jiberýge tıis. Bul rette kóterme jáne bólshek saýdany, turǵyn úı qurylysyn, turǵyn úıdi jáne kommertsııalyq jyljymaıtyn múlikpen operatsııalardy kredıtteýge, jeke tulǵalardy jáne basqa da birqatar salalardy kredıtteýge jol berilmeıdi, - delingen jaýapta.

Aıta keteıik, buǵan deıin Ulttyq bank BJZQ aktıvteriniń tıisti maqsatta jumsalýyn qalaı qadaǵalaıtynyn túsindirgen bolatyn.