BJZQ aqshasy jeke kapıtaldarǵa da salynýy múmkin
ASTANA. KAZINFORM — Ulttyq banktiń Monetarlyq operatsııalar departamentiniń dırektory Nurjan Tursynhanov Biryńǵaı jınaqtaýshy zeınetaqy qorynyń ınvestıtsııalyq tabysyn arttyrý úshin qandaı sharalar qabyldanatynyn aıtty.
— Biz byltyrdyń ózinde BJZQ-daǵy kiristiligi joǵary paketterdiń úlesin 40 paıyzǵa jetkizgenbiz. Bizdiń zeınetaqy júıesi áli «jas» ekenin, jınaqtaý rejıminde jumys istep jatqanyn aıtý mańyzdy. Jyl saıyn salymshylardan aqsha túsip jatyr, únemi ósip jatyr. Eger bıyl dollar satyp almasaq, kiristiligi joǵary aktsııalardyń úlesi 40 paıyzdan 35 paıyzǵa deıin quldyrap ketedi. Sondyqtan osy úlesti saqtaımyz. Aı saıyn 200-250 mln dollardy jyl aıaǵyna deıin valıýta naryǵynan satyp alyp otyramyz, — dedi ol Ulttyq bankte ótken baspasóz máslıhatynda.
Sondaı-aq, ol BJZQ aktsııalaryndaǵy damýshy elderdiń oblıgatsııalarynyń úlesi qansha ekenin aıtty.
— 40 paıyz sheteldik valıýtada degende onyń bárine dollar ǵana satyp aldyq degen sóz emes. 25 paıyzy aktsııalarǵa, 30 paıyz kólemde AQSh-tyń memlekettik baǵaly qaǵazdaryna salynǵan. Taǵy 25 paıyz damýshy elderdiń oblıgatsııalarynda jatyr. Bul Qazaqstanǵa uqsas elder. Munda táýekel qanshalyqty joǵary bolsa, kiristilik te sonshalyqty joǵary bolatynyn uǵý kerek. Taǵy 25 paıyzy AQSh dollarymen satyp alynǵan korporatıvtik oblıgatsııalarda jatyr. Uzaq merzimde jaqsy kiris beretin qural — aktsııalar. Iá, ol aıtarlyqtaı qubylmaly qural. Sáýir aıynan basynan beri aktsııalar qatty qubylyp jatqanyn kórip otyrmyz. Jańa tarıf saıasaty jarııalanǵannan keıin keıbir aktsııalar 15 paıyzdan joǵary mólsherde qulady. Byltyr aktsııalar 22 paıyz ósim kórsetkenin de aıtýymyz kerek. Onyń arǵy jylynda 24 paıyzdaı bolǵan. 2022 jyly 20 paıyz kemip ketken. Aktsııa - degen óte qubylmaly qural. Biraq uzaq merzimmen ólshep qarasaq, salymshylarǵa naqty kiris ákele alady, — dedi Nurjan Tursynhanov.
Ulttyq bank atalǵan 40 paıyzdyq úlesti saqtaýmen shektelmeýge bekinip otyrǵan kórinedi.
— 40 paıyzdyq úlespen shektelip qalmaı, balama qarjy quraldaryn engizemiz. Bul jeke kapıtal sııaqty anaǵurlym kiristi ınvestıtsııalar deýge bolady. Olar jarııa qarjy quraly bolmaǵanymen tarıhı ólshemmen alyp qarasaq, aktsııalarǵa qaraǵanda kirisi joǵary. Álemde bar tájirıbe. Búkil zeınetaqy qorlary anaǵurlym tabysty aktıvterge kóbirek aqsha salyp jatyr. Onyń ishinde jeke kapıtaldar da, hedj-qorlar da bar, — dedi Ulttyq bank ókili.
Osy is-sharada «Biryńǵaı jınaqtaýshy zeınetaqy qory» aktsıonerlik qoǵamynyń basqarýshy dırektory Murat Sháripov zeınetaqy jınaǵynyń bir bóligin merziminen buryn paıdalaný tetigin toqtaý týraly usynystarǵa jaýap berdi.