BJZQ-nyń jańa jetkiliktilik shegi: 30 myń azamat qana artyq jınaǵyn kádege jarata alady
ASTANA. KAZINFORM — Eń tómengi jetkiliktilik shegin esepteýdiń jańa ádistemesine sáıkes, belgilengen shekten joǵary zeınetaqy jınaqtary bar azamattardyń sany 30 myńnan sál asady. Bul týraly Biryńǵaı jınaqtaýshy zeınetaqy qorynan málim etti.
Sońǵy málimetterge qaraǵanda, 2026 jyldyń 5-10 maýsymy aralyǵynda eń tómengi jetkiliktilik sheginiń ulǵaıýynan keıin BJZQ turǵyn úı jaǵdaılaryn jaqsartýǵa arnalǵan birjolǵy zeınetaqy tólemderi boıynsha (jetkiliktilik shegi aıasynda) 52 ótinishti oryndady.
BJZQ qazaqstandyqtarǵa zeınetaqy jınaqtarynyń bir bóligin turǵyn úı satyp alýǵa jáne emdelýge merziminen buryn paıdalanýǵa ruqsat berilgennen keıin 2021 jyldyń qańtary men 2026 jyldyń 31 mamyry aralyǵynda bul quqyqty shamamen 1,5 mıllıon adam paıdalanǵanyn eske saldy. Onyń ishinde shamamen 950 myń salymshy men alýshy qarajatty turǵyn úı jaǵdaılaryn jaqsartýǵa jumsasa, taǵy 570 myńnan astam adam emdelý aqysyn tólegen.
— Jalpy, 5,8 trıllıon teńge alyndy. Onyń 5 trıllıon teńgeden astamy eń tómengi jetkiliktilik sheginen asatyn qarajat boldy. Bul rette turǵyn úı maqsattaryna 4,8 trıllıon teńgeden astam, al emdelýge shamamen 1 trıllıon teńge paıdalanyldy, — dep habarlady BJZQ agenttiktiń resmı saýalyna bergen jaýabynda.
Qordyń málimetinshe, eń tómengi jetkilik shegin esepteý ádistemesi ózgergenge deıin belgilengen shekten joǵary jınaqtary bar azamattardyń sany shamamen 500 myń bolǵan. Ádisteme qaıta qaralǵannan keıin olardyń sany 16 eseden astam qysqaryp, 30 myńnan sál asatyn deńgeıge deıin tómendedi.
Osy aıdyń basynda zeınetaqy jınaqtaryn merziminen buryn paıdalaný kezinde qoldanylatyn eń tómengi jetkiliktilik sheginiń parametrleri jańartyldy. Ózgerister salymshynyń qazirgi jasyn ǵana emes, onyń zeınetkerlik jasqa deıingi kezeńin, bolashaq zeınetaqy tólemderin, ınvestıtsııalyq kiristi jáne ózge de uzaq merzimdi faktorlardy eskeretin neǵurlym dál esepteý ádistemesin engizýge baılanysty qabyldandy.
