BJB men TJB nege alynyp tastaldy — Oqý-aǵartý mınıstrligi túsindirdi
ASTANA. KAZINFORM — 1 qyrkúıekten bastap 1-4 synyp oqýshylarynyń bilim jetistigin baǵalaý tártibi ózgeredi. Osyǵan oraı Oqý-aǵartý mınıstrligi baǵalaý júıesiniń nelikten ózgeriske ushyraǵanyn túsindirdi.
Mınıstrlik Y.Altynsarın atyndaǵy Ulttyq bilim akademııasymen birlesip, bastaýysh synyptardaǵy baǵalaý júıesiniń tıimdiligin zerdeleýge baǵyttalǵan keshendi jumys júrgizgen. Onyń ishinde bólim boıynsha jıyntyq baǵalaý (BJB) jáne toqsan boıynsha jıyntyq baǵalaý (TJB) máseleleri de qarastyrylǵan. Taldaý júrgizýge ata-analardyń bastaýysh synyptarda BJB men TJB-ny qoldaný máselelerin talqylaýdy ótinýleri, sondaı-aq pedagogter qaýymdastyǵynyń krıterıaldy baǵalaý júıesin jetildirý jónindegi usynystary negiz bolǵan.
— Júrgizilgen taldaý bastaýysh synyptarda BJB men TJB-ny qoldaný oqýshylardyń oqý jetistikterin tolyq kólemde kórsete bermeıtinin, balalarǵa qosymsha oqý jáne emotsıonaldyq júkteme túsiretinin kórsetti, — dep atap ótedi vedomstvodan agenttiktiń resmı saýalyna bergen jaýabynda.
Osyǵan baılanysty 2026 jylǵy 1 qyrkúıekten bastap 1-4-synyp oqýshylarynyń oqý jetistikterin nóldik, aralyq jáne toqsandyq qorytyndy baǵalaý kezinde baǵalaý tásilderi men nysandaryn qaıta qaraý týraly sheshim qabyldanyp otyr.
Bilim berý baǵdarlamasyn meńgerý deńgeıin baǵalaý úshin bastaýysh mektep oqýshylarynyń jas erekshelikterine sáıkes keletin aǵymdaǵy baqylaýdyń ártúrli nysandary qoldanylady. Olardyń qatarynda dıktant, mazmundama, baqylaý, praktıkalyq jáne shyǵarmashylyq jumystar bar.
Vedomstvonyń atap ótýinshe, bul pándik bilim deńgeıin, oqý jáne jazý saýattylyǵynyń damýyn neǵurlym obektıvti baǵalaýǵa múmkindik beredi. Sonymen qatar fýnktsıonaldyq saýattylyqty qalyptastyrýǵa, oqýshylardyń kognıtıvtik daǵdylaryn, synı oılaýyn jáne kommýnıkatıvtik quzyretterin damytýǵa yqpal etedi.
Buǵan deıin mektepte smartfon qoldanýǵa qatysty qandaı jańa erejeler qabyldanýy múmkin ekenin jazǵan edik.
