Bizge jıi synatyn arzan jabdyq qajet emes – Erbolat Dosaev memlekettik satyp alý týraly pikir bildirdi

ALMATY. KAZINFORM – Almaty ákimi Erbolat Dosaevtyń Naýryzbaı aýdanynyń turǵyndarymen kezdesýi kezinde BAQ ókilderi ákimdik tarapynan júrgizilgen memlekettik satyp alý týraly suraq qoıdy.

- Keshe Almaty mektepterine as úı jabdyqtaryn satyp alýǵa baılanysty Antıkordyń zertteý júrgizgeni belgili boldy. Satyp alýǵa belgilengen resmı baǵa 20 mıllıon bolsa, jabdyqtardy 60-70 mıllıonǵa alǵaly jatqan. Byltyr da 20 shaqty mektepke mundaı jabdyqty alǵan. Byltyrǵy satyp alýǵa baılanysty kim zertteý júrgizedi jáne joǵary baǵalar úshin kim jaýap beredi, – dedi jýrnalıst.

Almaty ákimi mektepterge as úı jabdyqtaryn satyp alýǵa baılanysty zertteýdi Sybaılas jemqorlyqqa qarsy is-qımyl agenttigi qalalyq ákimshilikpen birge júrgizgenin jáne 1,9 mlrd teńge bıýdjetke qaıtarylǵanyn aıtty. Sondaı-aq Erbolat Dosaev memlekettik satyp alý júıesiniń keı talaptarymen kelispeıtinin atap ótti.

- Keshegi aqparatqa baılanysty, biz Antıkormen birge bul jumysty istedik. Eshteńe satyp alynbady. Ekinshiden, usynylǵan 20 mıllıon teńgege kelispeımin. Eger osy jyl ishinde arzan as úı jabdyǵyn alyp, ol buzylǵandyqtan qaıta jóndeıtin bolsam, maǵan mektep úshin mundaı jabdyq qajet emes. Sondyqtan mundaǵy másele – baǵa men sapa talabyn oryndaý. Bizde barlyǵy eń arzan baǵada bolýy kerek te, sosyn bári «nege sonsha sapasyz» dep suraıdy. Óıtkeni kásipkerler sapasy tómen, eń arzan baǵadaǵy jabdyqtardy ákeledi. Biraq olar belgilengen talaptarǵa sáıkes. Men osy erejege qarsymyn. Memleket basshysy «Memlekettik satyp alý týraly» zańǵa qol qoıdy. Ol 2025 jyldyń 1 qańtarynan bastap kúshine enedi. Osy zań boıynsha kásipkerler ákelgen taýaryna ne kórsetken qyzmetine jaýap beredi. Qazir ókinishke qaraı, zańda kemshilikter bar jáne ony josyqsyz kásipkerler paıdalanyp júr, – dedi Almaty ákimi.

Eske salaıyq, buǵan deıin Erbolat Dosaev Almatydaǵy Qarǵaly ózeniniń aty ózgertý týraly suraqqa jaýap bergen edi.