Bizge jasandy ıntellektiniń qazaqstandyq modeli qajet — Erlan Qoshanov
ASTANA. KAZINFORM — Májiliste Qazaqstandaǵy jasandy ıntellektini damytý máselelerine arnalǵan Parlamenttik tyńdalym ótti. Bul týraly QR Parlamentiniń Májilisi málim etti.
Májilis tóraǵasy Erlan Qoshanov óz sózinde Prezıdent Qasym-Jomart Toqaevtyń jasandy ıntellektini damytý mańyzdylyǵyn birneshe ret atap ótkenin eske saldy. Ol týraly Memleket basshysy BUU-nyń 80-sessııasyndaǵy baıandamasynda da, sondaı-aq jýyrdaǵy Qazaqstan halqyna Joldaýynda da aıtqan bolatyn. Joldaýda Prezıdent úsh jyl ishinde Qazaqstandy tsıfrlyq memleketke aınaldyrý mindetin qoıdy.
— Bizge jasandy ıntellektiniń qazaqstandyq modeli qajet. Memleket basshysy aldymyzǵa osyndaı mindet qoıyp otyr. Ol — azamattarymyz úshin qaýipsiz, ekonomıkaǵa tıimdi, ulttyq múddelerimizge saı bolyp, elimizdiń progressıvti damýyna serpin berýge tıis. Bul — jaı ǵana jarys emes, aqyl-oı men bilimniń básekesi. Ol báıgede ozyq elderdiń qatarynda bolýǵa bizdiń múmkindigimiz jetkilikti. Osy jolda búgingi tyńdalym jasandy ıntelektini jappaı engizý isine ózindik úles qosady dep senemin, — dedi Erlan Qoshanov.
Májilis spıkeriniń aıtýynsha, búginde jahandyq deńgeıde tehnologııalar jarysy júrip jatyr. Osy oraıda jasandy ıntellektini qoldaný etıkasy men qaýipsizdik máselelerine erekshe kóńil bólinýi qajet. Bul kúni keshe Májiliste qabyldanǵan zańda kórinis tapty. Ol sondaı-aq jasandy ıntellekt tehnologııalarynyń eńbek naryǵyna, bilim berý salasyna jáne naqty ekonomıkanyń sektorlaryna tıgizip jatqan tıimdi yqpalyn mysalǵa keltirdi. Spıkerdiń pikirinshe, jasandy ıntellekt qazirdiń ózinde aýyl sharýashylyǵy men basqa da salalardyń bolashaǵy ǵana emes, búginine aınalýǵa tıis.
Májilis tóraǵasynyń aıtýynsha, bilim berý salasynda jasandy ıntellektini qoldaný boıynsha qoldaıtyndar da, oǵan qarsy shyqqandar da bolyp, qoǵamnyń ekige bólinýi — taǵy bir mańyzdy jaıt. Osy turǵyda Palata spıkeri jasandy ıntellekt muǵalimniń ornyn almastyrmaı, onyń kómekshisi bolýy mańyzdy ekenine toqtaldy.
Sonymen qatar Erlan Qoshanov Jasandy ıntellekt týraly zańnyń qabyldanýy — Memleket basshysynyń tapsyrmalaryn iske asyrýdaǵy alǵashqy qadam ǵana ekenine nazar aýdardy. Alda barlyq memlekettik organ men jurtshylyqty birlesken aýqymdy jumys kútip tur.
— Memlekettik organdar quqyqtyq aktiler men etıkalyq normalardy ázirleýge kirisedi. Bul rette tepe-teńdikti saqtaý mańyzdy. Osy salany shamadan tys rettep jibermeı, onyń damýyna qolaıly orta qalyptastyrý qajet. Óz kezeginde, depýtattyq korpýs bul másele boıynsha úılestirýshi rólin ári qaraı da atqarýǵa daıyn, — dedi Májilis spıkeri.
Spıker tsıfrlandyrýda úlken serpilis jasaýǵa ýaqyt az ekenin atap ótti.
— Ár mınýt qymbat. Memleket basshysy úsh jyldyq naqty merzimdi belgilep berdi. Sondyqtan ár salaǵa arnalǵan naqty jol kartalaryn ázirleý asa mańyzdy. Bul jumysqa memlekettik organdarmen birge Májilistiń salalyq komıtetteri de atsalysýǵa ázir, — dedi Erlan Qoshanov.
Sonymen birge ol kórsetkishter qýmaı, adamdardyń kúndelikti turmysyna paıdasyn tıgizetin sheshimder usynýǵa shaqyrdy.
Májilis tóraǵasynyń pikirinshe, árbir joba naqty paıda ákelip, qoǵamnyń turaqty damýyna yqpal etýge tıis.
Tyńdalym barysynda Jasandy ıntellekt jáne tsıfrlyq damý mınıstriniń mindetin atqarýshy Jaslan Mádıev, Ǵylym jáne joǵary bilim mınıstri Saıasat Nurbek, Dúnıejúzilik ekonomıkalyq forýmnyń sarapshysy Henrık fon Sheıl, IT-kompanııalardyń ókilderi men sarapshylar sóz sóıledi.
Parlamenttik tyńdalym aıasynda jasandy ıntellekt, tsıfrlyq tehnologııalar jáne ınnovatsııalar salasyndaǵy jobalar kórmesi ótti. Memlekettik organdar men IT-kompanııalar memlekettik qyzmetter men quqyq qorǵaý júıesinen bastap, medıtsına, bilim berý, logıstıka jáne qurylysqa deıingi 20-dan astam joba usyndy.
Aıta keteıik, buǵan deıin Májilis tóraǵasy Qazaqstan JI engizýge daıyndyq reıtıngisinde 76 orynda ekenin aıtqan edi.