Bizge batyl ári bilimdi basshylar qajet – Qasym-Jomart Toqaev
ASTANA. KAZINFORM — Qazirgideı kóz ilespes jyldamdyqpen ózgerip jatqan zamanda beıqam, jasyq ári jaýapsyz bolsaq, tyǵyryqqa tap bolamyz. Bul týraly QR Quryltaıynyń birinshi sessııasynyń ashylýynda Memleket basshysy Qasym-Jomart Toqaev málim etti.
- Bizge jaýapkershilikten qashpaıtyn, batyl, belsendi, bilimdi basshylar, naqty ózgeris jasaı biletin azamattar qajet. Keler urpaq keıbir kemshiligimizge túsinistikpen qaraıtyn da shyǵar. Sebebi jumys qateliksiz bolmaıdy. Biraq biz reformalardy aıaǵyna deıin jetkizbeı, Ádiletti Qazaqstandy qurý jolyndaǵy tarıhı múmkindikti múlt jibersek, olar bizdi eshqashan keshirmeıdi. Qazirgideı kóz ilespes jyldamdyqpen ózgerip jatqan zamanda beıqam, jasyq ári jaýapsyz bolsaq, tyǵyryqqa tap bolamyz, - dedi Qasym-Jomart Toqaev.
Prezıdenttiń aıtýynsha, elimizdiń erteńi árbir depýtattyń ynta-yqylasyna, qajyr-qaıratyna jáne otanshyldyǵyna baılanysty ekeni sózsiz.
- Sizder – túrli qyzmette tabysqa jetip, mol tájirıbe jınaǵan bilikti mamansyzdar. Ózderińizdi jaýapty, jurtqa janashyr, bastamashyl azamat retinde tanytyp kelesizder. Endi osy tájirıbeni el ıgiligine jaratyp, Qazaqstandy damytý úshin tabandy eńbek etesizder dep senemin, - dedi Memleket basshysy.
Aıta keteıik, búgin Astanada Prezıdenttiń qatysýymen birinshi shaqyrylymdaǵy QR Quryltaıynyń birinshi sessııasy ashyldy.
