«Bizdiń jan jaramyzdy eshqandaı jaza ólsheı almaıdy»: qaza tapqan kenshilerdiń týystarynyń pikiri

QARAǴANDY. KAZINFORM – 2023 jylǵy qazanda Kostenko atyndaǵy shahtada bolǵan apattan 46 kenshi qaza tapqan qylmystyq is boıynsha sot úkimi jarııalandy. Degenmen marqumdardyń týystary taǵaıyndalǵan jaza merzimderin ádil dep sanamaıdy.

— 46 adamnyń ómiri qıylǵanda, ony bas bostandyǵynan aıyrý jazasymen ólsheý múmkin emes. Bul — jaı ǵana sandar emes, bul — adam taǵdyry, — deıdi kúıeýinen aıyrylǵan áıelderdiń biri. — Biz jumysqa deni saý, eńseli er-azamattardy attandyrdyq. Al bizge oralǵany — bir paketke salynǵan jeıde men shalbary ǵana. 

Qaza bolǵan kenshilerdiń týystarynyń aıtýynsha, keıbir aıyptalýshylarǵa berilgen segiz jyldyq jaza da — «tym az». Apellıatsııaǵa júginý máselesin otbasylar birigip sheshpek.

— Men sottyń árbir otyrysyna qatystym, — deıdi qaza tapqan kenshiniń qyzy Vıoletta Ivanchına. — Biz úshin eń bastysy — kinálilerdiń laıyqty jaza alýyna kóz jetkizý boldy. Osy maqsatta arnaıy top quryp, sot zalynda bolǵan jaıdy kún saıyn týystarǵa jetkizip otyrdyq. Óıtkeni sotqa qatysý bárimiz úshin de óte aýyr boldy. 

Jaqyndary «eshqandaı merzim qaza tapqandardy qaıtara almaıdy» deıdi. 

Biraq tek jeńil jaza ǵana emes, sottaǵy aıyptalýshylardyń qylyǵy da olardyń ashý-yzasyn týdyrǵan.

— Biz eń bolmaǵanda azdap bolsa da janashyrlyq tanytatyn adamdardy kóremiz dep oıladyq. Biraq olar ózderin tym senimdi ustap, tipti órkókirektik tanytty. Keıbiri sot kezinde kúlip otyrdy. Eshqaısysy bizge kelip, keshirim suraǵan joq. Kerisinshe, ózderin kinásiz dep sanap, tergeýshiler men kýágerler qatelesedi dedi, — deıdi marqum kenshiniń qyzy.

Onyń aıtýynsha, sot barysynda qaza bolǵandardyń abyroıyn taptaıtyn sózder de aıtylǵan.

— «Kenshilerdiń biliktiligi jetkiliksiz boldy» degendi estidik. Al shyn máninde olardyń kóbi 30 jyldan astam tájirıbesi bar, óz isiniń has sheberi edi. Mundaı sózdi kýágerlerden estý óte aýyr boldy, — deıdi ol.

Qaza bolǵan taǵy bir kenshiniń jesiri bul qasiret ondaǵan otbasynyń taǵdyryn oırandatyp ketkenin aıtady:

— Aqsha bizge kúıeýlerimizdiń, ákelerimizdiń, uldarymyzdyń ornyn toltyra almaıdy. Kúıeýimniń aman oralǵanyn kórý úshin barymdy berer edim. Biraq ol joq. Al kináliler bir kúni bostandyqqa shyǵyp, ómirin jalǵastyrady. Sol sebepti biz úshin ádil jaza — eń qatańy edi.

Eske salsaq, Eske salsaq, Kostenko atyndaǵy shahtadaǵy jarylys 2023 jylǵy 28 qazanda tańerteń boldy. Resmı málimet boıynsha, metan gazynyń detonatsııasy kómir shańynyń jarylys tizbegin shaqyrǵan, onyń kontsentratsııasy ruqsat etilgen normadan edáýir joǵary boldy. 

Apat kezinde jer astyda 252 adam bolǵan. 205 shahter jer betine shyǵaryldy. Jeti adam denesi birden tabyldy, biraq bir saǵat ishinde qurban sany onǵa jetti. 31 qazanda 46-shy shahterdiń denesi tabyldy. 

Osy jyldyń 5-shi naýryzynda Qaraǵandyda Kostenko shahtasyndaǵy jarylysqa qatysty sot bastaldy. Qos taraptyń pikirtalasy barysynda prokýrorlar aıyptalýshylarǵa eń qatań jaza surady. 

Búgin Kostenko atyndaǵy shahtadaǵy jarylysqa qatysty sot protsesi aıaqtaldy. 10 aıyptalýshy 5 jyldan 8 jylǵa deıin bas bostandyǵynan aıyryldy.