Toqaev túrki elderinde álemniń úzdik ýnıversıtetteriniń fılıalyn ashýdy usyndy

Qazaqstan ekonomıkalyq yntymaqtastyq uıymyna Túrki memleketteri uıymynyń baıqaýshysy mártebesin berý bastamasyn qoldaıdy. Bul týraly Aqordada ótip jatqan Túrki memleketteri uıymynyń H sammıtinde Memleket basshysy Qasym-Jomart Toqaev aıtty, dep habarlaıdy Kazinform.

«Úshinshi basymdyq – reformalar (Reforms). Uıym qyzmetin ońtaılandyrý sharalaryn jalǵastyrý kerek. Osyǵan oraı Túrki memleketteri uıymy janyndaǵy turaqty ókilderimizdi taǵaıyndaý máselesin tezirek sheshýge shaqyramyn. Sondaı-aq hatshylyq qyzmetkerleriniń sanyn kóbeıtý týraly usynysty qoldaımyz», - dedi Memleket basshysy.

Prezıdent Túrki memleketteriniń saılaý salasyndaǵy yntymaqtastyǵyn nyǵaıtý qajettigin basa aıtty.

«Ortalyq saılaý organdarynyń konsýltatıvtik keńesin qurýǵa bolady. Sońǵy kezde bizdiń uıymǵa halyqaralyq jáne aımaqtyq qurylymdardyń qyzyǵýshylyǵy arta tústi. Biz Ekonomıkalyq yntymaqtastyq uıymyna baıqaýshy mártebesin berý týraly bastamany qoldaımyz. Sonymen qatar Azyq-túlik qaýipsizdigi jónindegi Islam uıymymen yntymaqtastyq ornatýdy usynamyz», - dedi Qasym-Jomart Toqaev.

Ol sondaı-aq túrki elderinde álemdegi úzdik ýnıversıtetterdiń fılıalyn ashýdy usyndy

«Tórtinshi, ǵylymı áriptestik (Knowledge) arqyly bilim jáne ǵylym salasyndaǵy yntymaqtastyqty nyǵaıtý asa mańyzdy. Osy oraıda elderimizde álemdegi úzdik ýnıversıtetterdiń fılıalyn ashýdy usynamyn. Birlesken ǵylymı sharalar ótkizip, tájirıbe almasý kerek. Til úıretetin bólimderdi ashýǵa qatysty jumysty retteý qajet. Jasandy ıntellektini, tsıfrlyq jáne aeroǵarysh ónerkásibin damytýǵa erekshe nazar aýdarǵan jón», - dedi Memleket basshysy.