Juldyz Súleımenova: Bizdiń mindet — jańa býyn tehnologııasy kómekshi qural bolatyn bilim berý ortasyn qalyptastyrý
ASTANA. KAZINFORM — QR Oqý-aǵartý mınıstri Juldyz Súleımenova elordada ótken «Tsıfrlyq dáýirdegi mektep bilimi: basty trendter men talaptar» XIV halyqaralyq konferentsııa aıasynda halyqaralyq jetekshi sarapshylarmen kezdesip, jańa býyn tehnologııalaryn bilim berý júıesine engizý máselesin talqylady.
Elimizde Memleket basshysynyń tapsyrmasyna sáıkes bilim berý júıesine jańa tehnologııalyq sheshimder men jasandy ıntellektini engizý boıynsha keshendi bastamalar men jobalar qolǵa alyndy.
Mınıstrmen kezdesýge brıtandyq bilim berýdegi JI salasyndaǵy sarapshy Den Fıtspatrık, Bedrock AI, Diverse AI negizin qalaýshy jáne bas dırektory Todjý Dıýk, aýstralııalyq Kertın ýnıversıtetiniń Bilim berý mektebiniń joǵary oqý ornynan keıingi zertteýler jónindegi dırektory Kok-Sıng Tang, Adelaıda ýnıversıtetiniń jasandy ıntellekt jáne bilim berý salasyndaǵy professory Raıan Beıker, sondaı-aq «Nazarbaev Zııatkerlik mektepteri» DBBU-nyń basqarma tóraǵasy Ánýar Janǵozın qatysty.
Kezdesýde qatysýshylar tsıfrlyq transformatsııa jaǵdaıyndaǵy mektep biliminiń qazirgi úrdisteri, syn-qaterleri men perspektıvalary, zamanaýı tehnologııalardy bilim berý júıesiniń damýyna tıimdi baǵyttap paıdalaný jóninde pikir alysty.
— Bilim berý salasynda jasandy ıntellekt pen tehnologııalyq jańalyqtardy engizýde negizgi ról árdaıym muǵalimge berilýi qajet. Shynaıy bilimniń máni — adamnyń zerdesi, adaldyǵy men júrek jylýynda. Bizdiń mindet — bilim berý júıesinde jasandy ıntellektini tıimdi paıdalana otyryp, jańa býyn tehnologııasy kómekshi qural bolatyn bilim berý ortasyn qalyptastyrý, — dedi Oqý-aǵartý mınıstri.
Sondaı-aq, qatysýshylar jasandy ıntellektti qoldanýda bilim alýshylar tarapynan akademııalyq adaldyqtyń saqtalýyn kúsheıtý joldaryn birlesip talqylady. Halyqaralyq sarapshylar jańa býyn tehnologııalaryn bilim berý júıesine engizý boıynsha óz kózqarastaryn usyndy.
— Qazaqstannyń jasandy ıntellekt tehnologııalaryn engizýge jáne oqýshylardy jańa tehnologııalyq dáýirge qajetti zamanaýı quraldar men daǵdylarmen qamtamasyz etýge degen talpynysy erekshe áser qaldyrdy, — deıdi sarapshy Den Fıtspatrık.
Aıta ketý kerek, elimizde búginde jasandy ıntellektti engizý boıynsha keshendi jumystar júrgizilip jatyr. Oqytýdy derbestendirýge baǵyttalǵan «AI Kitap» platformasy iske qosylyp, «Day of AI» onlaın-ádistemelik kesheni ázirlendi. Jasandy ıntellektti qaýipsiz ári ádil qoldaný maqsatynda etıkalyq standarttar bekitildi. Pedagogterdiń jasandy ıntellektti tıimdi qoldaný biliktiligin arttyrý úshin úsh deńgeıli oqytý júıesi engizildi. Sonymen qatar mınıstrlikpen jasandy ıntellektini bilim berý júıesine engizý deńgeıin baǵalaıtyn ulttyq qural daıyndalyp jatyr.
Aıta keteıik, buǵan deıin Juldyz Súleımenova bilim salasyndaǵy jańa basymdyqtardy ataǵan bolatyn.