Bizdiń azamattardy AQSh-tan shyǵaryp jiberý týraly aqparat túsken joq — SІM

ASTANA. KAZINFORM — Elimizdiń Syrtqy ister mınıstrligi AQSh-taǵy mıgratsııalyq saıasattyń qatańdatylýyna baılanysty Qazaqstan azamattarynyń taǵdyryna qatysty túsinik berdi.

— Búginde Syrtqy ister mınıstrligine nemese Qazaqstannyń AQSh-taǵy elshiligine eshkim júgingen joq. Elshilik máseleni baqylaýda ustaıdy. Jaqynda ǵana elshilik AQSh-taǵy qazaqstandyqtarǵa úndeý jarııalady. AQSh-tyń kóshi-qon zańnamasy kúsheıtilip jatqanyn jáne bizdiń azamattarǵa eskertý jasalǵany habarlandy, — dedi Syrtqy ister mınıstriniń orynbasary Álibek Baqaev Májilistiń jalpy otyrysynan keıin ótken baspasóz máslıhatynda.

Mınıstr orynbasarynyń aıtýynsha, qýdalaýǵa negizinen vıza rejımin buzǵan azamattar ushyraıdy. 

— Birqatar obektıvti nemese sýbektıvti jaǵdaılarǵa baılanysty adamdar AQSh-qa týrıstik vızamen baryp, bolý merzimine nazar aýdarmaı, zańdy buzatyny - qalypty tájirıbe. Mundaı azamattardyń Otanyna oralýyna múmkindik beretin belgili bir sharalar men tetikter bar. Mindetti emes bolyp sanalatyn konsýldyq esepte turǵan qazaqstandyqtarǵa keletin bolsaq, olardyń sany - shamamen 25 myń adam, — dep tolyqtyrdy ol.

Sondaı-aq Álibek Baqaev ázirge Qazaqstan azamattaryn AQSh-tan shyǵaryp jiberý týraly aqparattyń joqtyǵyn aıtty. 

Eske sala ketsek Donald Tramp bılikke kele sala AQSh-ta jumys isteýge ruqsat beretin mıgratsııalyq qosymshanyń jumysyn toqtatty.

Osydan birer kún buryn AQSh-taǵy mıgratsııalyq saıasattyń qatańdatylýyna baılanysty Qazaqstan elshiligi shetelde qujatsyz, vızasyz júrgen qazaqstandyqtarǵa eskertý jasady.

Odan bólek AQSh shetel azamattaryna qandaı vızalar beretini týraly jazǵan bolatynbyz.