Bizderde mynadaı bar: Astanada ózbek óneriniń kórmesi ashyldy
ASTANA. KAZINFORM – Ulttyq mýzeıde QR Mádenıet jáne aqparat mınıstrliginiń qoldaýymen Ózbekstannyń beıneleý jáne qoldanbaly óner kórmesiniń saltanatty ashylý rásimi ótti. Kórme Ózbekstan Respýblıkasynyń Prezıdenti Shavkat Mırzıeevtiń Qazaqstan Respýblıkasyna memlekettik sapary aıasynda uıymdastyrylyp otyr.
Sondaı-aq, táýelsizdik jyldary eki el arasynda qalyptasqan mádenı-aqparattyq dıalogty jalǵastyrý maqsatynda ótip jatyr.
«Búgingi kórme tarıhy ortaq qazaq jáne ózbek ultynyń dostyǵyn taǵy bir márte pash etip, rýhanı baılanysty arttyra túspek. Bul kórmede ózbek sýretshileriniń sońǵy onjyldyqtaǵy tartymdy týyndylary qoıylǵan. Jalpy, ózbek qylqalam sheberleriniń ózindik erekshelikteri mol ekenin atap ótken jón»,- dedi MAM Mádenıet komıtetiniń tóraǵasy Kúmis Seıitova.
Sala mamandary sońǵy jyldary Ózbekstannyń óneri jańa bıikterge kóterilgenin alǵa tartyp otyr.
«Biz Qazaqstandaǵy óner súıer qaýymdy qyzyqtyratyn ózbek sýretshileriniń jumystaryn ákeldik. Qazaqstanmen únemi ortaq jobalar júrgizip otyramyz. Jalpy, Ózbekstan men Qazaqstan óneri uqsas, óıtkeni bizdiń túpki tamyrymyz ortaq»,- dedi Ózbekstan Óner Akademııasynyń tóraǵasy Akmal Nýrıdınov.
Kórmege Akmal Nýrıdınov, Alısher Hamdamov, Tatıana Fadeeva, Faızýlla Ahmadalıev, Shahnoza Abdýllaeva, Bahtıer Mahkamov, Hýrshıd Zııahanov jáne Ózbekstan Óner akademııasynyń músheleri men Ózbekstannyń ártúrli aımaqtarynyń talantty jas sýretshileri men qoldanbaly óner sheberleriniń týyndylary qoıylǵan.
Atap aıtsaq, zamanaýı keskindeme týyndylary Shyǵystyń ejelgi ańyzdarynan, poezııasy men tarıhynan rýhtanǵan romantıkalyq beınelerden bastap, Ózbekstannyń sulý tabıǵaty men ulttyq turmysyna tán sıpattaryn ashyp kórsetetin naqty sıýjetterge deıingi sýretshilerdiń stılıstıkalyq erekshelikteriniń ártúrliligin, qyzyǵýshylyqtary men shyǵarmashylyq kózqarastarynyń keń aýqymyn kórsetedi.
Al kórmeniń qoldanbaly óner bóliminde zamanaýı ózbek sheberleriniń buıymdary usynylǵan. Ózbekstannyń halyq óneri kópǵasyrlyq dástúrlerge negizdelgen shyǵarmashylyqtyń san alýan túrlerine baı. Ol halyq ómiri men turmys-tirishliginiń barlyq jaǵyn qamtıdy. Halyq shyǵarmashylyǵynyń buqaralyq sıpaty, estetıkalyq joǵary armandary men jasampaz negizderi Ózbekstan mádenıetine degen álemdik qaýymdastyqtyń joǵary qyzyǵýshylyǵyn aıqyndap berdi.
Ekspozıtsııaǵa barlyǵy 80-ge jýyq kartına jáne 100-den astam sándik-qoldanbaly óner týyndylary qoıylǵan. Kórme 8 tamyzǵa deıin jumysyn jalǵastyrady.
