Bizden de álem chempıony shyǵady – Erlan Myrzaǵulov, Aqtóbe oblysynyń aǵa bapkeri
ASTANA. KAZINFORM - Almatyda kúres túrlerinen 17 jáne 20 jasqa deıingi balýandar arasyndaǵy Qazaqstan birinshiligi aıaqtalýǵa jaqyn. Elimizdiń barlyq óńirinen kelgen jas sportshylar Alataý baýraıynda ózara myqtylardy anyqtaýda.
Osy oraıda grek-rım kúresinen U-20 balýandar arasynda top jarǵan Aqtóbe oblysynyń aǵa bapkeri Erlan Myrzaǵulov suhbat berip, óńirdegi kúrestiń búgingi bet-alysyn baıandap berdi.
Aıta ketsek, Aqtóbe oblysy grek-rım kúresinen elimizge tanymal balýandardy syılaǵan ólke. Ásirese, «klassıkalyq» kúres Shalqar aýdanynda qarqyndy damyǵan. Osy óńirdiń týmasy Meırambek Aınaǵulov álem chempıonatynda eki ret júldeger atanyp, Tokıo Olımpıadasynda baq synady. Almatydaǵy el chempıonatynda da aqtóbelik grek-rım kúresi sheberleri jalpykomandalyq esepte kósh bastady.
- Aqtóbelik balýandar sátti óner kórsetip, jaqsy jetistikterimen kózge túsip júr. Almatydaǵy el chempıonatynda da aqtóbelik grek-rım kúresi sheberleri jalpykomandalyq esepte kósh bastady. Osy jetistikterińizdiń syrymen bólise ketseńiz?
- Bizdiń jaqsy nátıje kórsetýimizge Aqtóbede sportta daryndy balalarǵa arnalǵan mektep-ınternattyń salynýy birden-bir sebep bolyp otyr. 2017 jyly óńirimizde Eset batyr atyndaǵy sport ınternaty ashyldy. Buǵan deıin talaı balýandy daıyndap, endi nátıje kórsetetin shaǵynda Almaty men Astanaǵa jiberetinbiz. Óıtkeni, negizgi ınternattar sol jaqta edi. Qazir jigitter kóz aldymyzda, ózimizdiń qolymyzda ósip jatyr. Al bapker úshin shákirtiniń jetistiginen asqan baqyt bar ma? Bar sanaly ǵumyrymyz kilemniń aınalasynda ótip jatyr. Biz de qazaqtan chempıon shyǵarýdy, grek-rım kúresinen Jaqsylyq atamyzdyń izbasaryn daıyndaýdy armandaımyz. 20 jasqa deıingi balýandar arasyndaǵy Qazaqstan birinshiliginde aqtóbelik grek-rım kúresiniń sheberleri 1 altyn, 2 kúmis, 5 qola medal ıelenip, 126 upaımen jalpy esepte birinshi orynǵa shyqty.
- Demek, qazir aımaqtaǵy kúres túrlerin damytýǵa erekshe kóńil bólinip jatyr deýge tolyq negiz bar ǵoı...
- 55 kelidegi basty juldyzymyz — Arsen Juma. Osymen elimizdiń eki dúrkin chempıony atanyp otyr. Odan bólek, taǵy eki balýanymyz fınalda beldesip, jeńildi. Úsh fınalıst shyǵardyq. Qola medal alǵan, tipti, jeńilip, medalsiz qalǵan jastarymyz da jaqsy kúres kórsetti. Bizdiń maqsatymyz – jastar arasyndaǵy álem, Azııa chempıonatyna joldama alý. Eresekter quramasyna Aqtóbe kúres mektebiniń ókilderin qosyp, elimizdiń namysyn álemdik jarystarda qorǵaýǵa úles qosý. Qazir aımaqtaǵy kúres túrlerin damytýǵa erekshe kóńil bólinip jatyr. Oblystyq sport basqarmasyna Meırambek Mahambetov kelip jatyr. Taǵaıyndalǵanyna az kún bolsa da, bizge kómegin aıamaı, osy jarysqa alańsyz attanýymyzǵa jaǵdaı jasady. Ol budan buryn da oblystyq sport salasyn basqaryp, jaqsy nátıjelerimizge sebepshi bolǵan.
- Aqtóbede Shalqar aýdany«klassıkalyq» kúrestiń otany dep atylp ketken. Qazir atalǵan óńirde kúrestiń damyýy qalaı bolyp jatyr?
- Qazirgi tańda grek-rım kúresi Aqtóbe oblysynyń Shalqar aýdanynda qarqyndy damyp keledi. Durys aıtasyz, bizdiń aımaqta «klassıkalyq» kúrestiń otany – Shalqar aýdany. Osy óńirdegi grek-rım kúresiniń tarıhy da, qazirgi damý qarqyny da jaqsy. Oblystyń ózge óńirlerinde erkin jáne áıelder kúresine basymdyq berilgen. Biz Shalqar mektebiniń túlegi bolǵandyqtan, ózimizdiń eń myqty salamyzdy damytýǵa kúsh salamyz. Ózim de jasóspirimder deńgeıinde kúrestim. Áıgili balýanymyz Nurbaqyt Teńizbaevpen, Erbol Qońyratovpen birge oqyǵanmyn. Olar sııaqty kilemde jarqyrap júre almasam da, bar ǵumyrymdy shákirt tárbıeleý degen sanaly iske arnap jatyrmyn. Shákirtterimniń shoqtyǵy bıik bolsa eken dep tileımin.
- Áńgimeńizge rahmet!