Bizdegi joldardyń kóbi eski standartpen salynǵan – Úkimet basshysy
ASTANA. KAZINFORM – Premer-Mınıstr Oljas Bektenov jol qurylystarynyń uzaqqa sozylýy adam ólimine sebepker bolyp jatqanyn aıtty.
«Avtojoldardyń kópshiligi eski standarttar boıynsha salynǵan. Sondyqtan keıingi jyldary jańa magıstraldardyń qurylysy qolǵa alyndy. Alaıda, keıbir joldardyń qurylysy men jóndelýi tym uzaqqa sozylyp ketti. Onyń ústine, salynyp jatqan ýchaskelerde jol belgileri men aqparat qalqandary, ýaqytsha jol tańbalary joq nemese eskertý belgileri durys ornatylmaı, júrgizýshi olardy baıqamaı qalady. Munyń sońy jol apattaryna alyp keledi», - dedi Premer-Mınıstr.
Sondaı-aq, ol Almaty oblysynda «saqaldy qurylysqa» aınalǵan jolda apat jıi bolatynyn synady.
«Bıylǵy naýryz aıynda 2019 jyldan beri qurylys jumystary júrgizilip jatqan «Qaraǵandy – Almaty» baǵytynda jeńil avtomashına júk kóligimen soqtyǵysyp, 4 adam qaza tapty. Al mamyr aıynda dál osy jolda kólik apatynan taǵy 5 adam qaıtys boldy. Kináliler, árıne, jazasyn aldy. Degenmen, áńgime júıeli sharalar týraly bolyp otyr. Kólik mınıstrligine múddeli memlekettik organdarmen birlesip, avtomobıl joldaryn salý, rekonstrýktsııalaý jáne kútip-ustaý kezinde jol qozǵalysy qaýipsizdigin qamtamasyz etý jónindegi sharalar keshenin qabyldaýdy tapsyramyn», - dedi Premer-mınıstr.
