Bálkim bizdegi sıyr etiniń baǵasy álem boıynsha eń arzany bolar — Serik Jumanǵarın

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın eldegi sıyr eti baǵasyna qatysty túsinik berdi.

— Bizdegi sıyr eti — postkeńestik keńistikte ǵana emes, bálkim álem boıynsha eń arzan ónimderdiń biri. Mal sharýashylyǵymen aınalysqysy keletin adam kóp emes. Ol degenimiz — jyl on eki aı demalyssyz eńbek etetin adam. Tańǵy 5-te turady, malǵa sý berý kerek, qorany tazalaý kerek, malǵa jemshóp berý qajet. Senbi, jeksenbi degen demalys joq. Onyń ústine et alý úshin kem degende 3 jyl ýaqyt kerek. Sonda ettiń quny qansha bolýy tıis dep oılaısyz? Qymbat degen ne? Arzan degen ne? — degen saýal qoıdy Serik Jumanǵarın Prezıdenttiń Qazaqstan halqyna Joldaýynan keıin BAQ ókilderiniń saýalyna jaýap bere turyp.

Mınıstrdiń aıtýynsha, kórshi elderde Qazaqstannyń eti 10-12 dollardan satylyp jatyr. 

— Mázirde «Qazaqstannyń eti» dep jazylyp turady jáne oǵan úlken suranys bar. Bizde ondaı baǵa joq. Sondyqtan birden aıtaıyn, et eksportyn jappaımyz. Eksporttyq kelisimsharttar bar, uıymdasqan, bordaqylaý alańdary bar, adal tabys taýyp otyrǵan sharýashylyqtar eksportty jalǵastyra beredi. Al eshteńe óndirmeı, maldy arzanǵa alyp, jetkilikti jemshóp bermeı, tek bir sáttik paıdaǵa umtylatyn deldaldarǵa jol bermeımiz, ruqsat etpeımiz, — dep túsindirdi vıtse-premer.

Buǵan deıin vıtse-premer elimizdegi kartop baǵasyna qatysty oıyn ortaǵa salǵan edi. 

Birneshe kún buryn Aýyl sharýashylyǵy vıtse-mınıstri Azat Sultanov soǵym maýsymy jaqyndap qaldy elde et baǵasy qalaı bolady degen saýalǵa jaýap berdi.